UVIÉU, 1 Oct. (EUROPA PRESS) -
Efectivos de Bomberos del Serviciu d'Emerxencies del Principáu d'Asturies (SEPA), con base nel parque de Pravia, rescataron esta nueche'l cuerpu ensin vida d'un varón d'unos 70 años que cayó al agua, cuando taba pescando na redoma del faru del puertu de San Esteban.
Según informó'l Serviciu d'Emerxencies, el Centru de Coordinación d'Emerxencies, l'avisu recibióse a les 0.43 hores d'esti miércoles, una primer llamada na qu'una persona informó de que viera cayer a daquién al agua. L'alertante taba al otru llau de la ría. Prácticamente coles mesmes recibióse un segundu avisu, d'un familiar del fináu, indicando que cayera al agua y taba flotando pámpana abaxo cerca de la vera.
El fináu ye un varón, d'aproximadamente unos 70 años d'edá. La Guardia Civil fíxose cargu de los trámites pa proceder al llevantamientu del calabre. Hasta'l llugar tamién se movió, movilizáu pol Serviciu d'Atención Médica Urxente (SAMU), l'equipu médicu d'Atención Primaria de la zona cola ambulancia de soporte vital básicu, pero los facultativos namás pudieron verificar el so fallecimientu.
Tamién movilizó una dotación, compuesta por cuatro efectivos, de Bomberos del SEPA con base nel parque de Pravia que, en llegando al incidente, confirmó que l'home taba cerca de la vera, enredáu nunos apareyos y rescataron el cuerpu, concluyendo la operación a les 1.28 hores.
La Sala 112 del SEPA, amás de movilizar a los bomberos y infomar al SAMU, comunicó lo asocedío a la Guardia Civil y a Salvamentu Marítimu en Xixón.
