MADRID, 30 de Marzu (EUROPA PRESS)
El presidente de Ciudadanos, Albert Rivera, anunció esti xueves que'l so partíu apoyará nel Congresu los Presupuestos Xenerales del Estáu pal 2017, n'algamando, la nueche d'esti miércoles, un acuerdu que ye inclusive "meyor" de lo qu'esperaben.
Nuna entrevista n'Antena 3, recoyida por Europa Press, precisó que les cuentes van incluyir 4.100 millones en partíes pa la clase medio y trabayadora, penriba de los 3.850 pactaos pol mesmu Rivera y el presidente del Gobiernu, Mariano Rajoy, cuando acordaron n'avientu'l techu de gastu.
Con too, los votos de Ciudadanos nel Congresu nun-y basten al PP pa superar el primer trámite d'unes cuentes públiques que prevé aprobar mañana nel Conseyu de Ministros. Pa superar les enmiendes a la totalidá que presente la oposición va precisar tamién los de PNV y el de CC, pa sumar asina 175. Pa l'aprobación final del dictame precisa un votu más, y ye ehí onde'l Gobiernu mira al diputáu de Nueva Canaries.
D'acordies con Rivera, colos Presupuestos que'l so partíu acordó col Gobiernu va devolver a la clase media y trabayadora l'esfuerzu que fizo mientres la crisis. Tamién destacó que Ciudadanos lluchó pa que nun se suba nengún impuestu, tampoco los impuestos especiales.
Ente les partíes incluyíes, destacó'l complementu salarial xuvenil, la partida p'aumentar a un mes el permisu de paternidá, la estensión de seis meses a un añu de la tarifa plana p'autónomos y el plan pa la probeza infantil. Tamién incidió nes partíes de "futuru", como'l plan contra'l fracasu escolar, ayudes pa llibros de testu y que, la primer vez tres años retayos, vaya a aumentase la I+D+i un 4 por cientu.
Por too ello, cree que son unos "Presupuestos bastante razonables" pa llograr amenorgar el déficit dende'l 4,6 por cientu actual hasta l'oxetivu del 3,1 por cientu y, amás, mostróse convencíu de qu'esi oxetivu va cumplise.
