RPA escueye'l meyor cantar asturianu de tolos tiempos

Leticia González nun conciertu.
LLORÍAN GARCÍA.
Actualizado: domingo, 29 abril 2018 10:07

UVIÉU, 29 Abr. (EUROPA PRESS) -

La Radio del Principáu d'Asturies (RPA) va emitir d'esti llunes 30 al xueves 3 de mayu 'Top 25 n'ast'. Van ser cuatro programes de 30 minutos onde, al xeitu d'una radiofórmula, van sentise los 25 meyores cantares n'asturianu de tola historia.

La escoyeta fixóla un xuráu de más de 30 personalidaes del mundu de la cultura asturiana --académicos, filólogos, músicos, escritores, actores, promotores, xestores culturales y profesores universitarios--. D'una primera esbilla surdieron 200 cantares de los que los 25 que se van poder sentir en RPA foron los más votaos.

Nel programa van poder escuchase los temes del 25 al 1, polo que'l xueves va conocese'l que va ser el cantar más votáu y, polo tanto, el consideráu polos espertos como'l meyor cantar asturianu de tolos tiempos.

El programa, presentáu por Xune Elipe, va emitise a les 21.00 hores en RPA y ta incluyíu dientro de la programación especial de la radiotelevisión autonómica pa celebrar la Selmana de les Lletres Asturianes, que nel casu de la emisora pública va tar esti añu centrada na música.

Asturianu ofrecido por