MOSCÚ, 25 de Payares (EUROPA PRESS)
El ministru d'Esteriores de Rusia, Sergei Lavrov, repitió les sos "dudes" sobre les circunstancies en que se derribó un caza rusu na frontera ente Turquía y Siria y alvirtió de que paez más una prevocación entamada" qu'un "accidente".
El ministru d'Esteriores turcu, Mevlut Cavusoglu, llamó esti miércoles al so homólogu rusu pa espresa-y los sos condolencias pol socesu del martes, nel qu'un SU-24 cayó a tierra por un misil disparáu poles fuerces de Turquía. El Gobiernu turcu adelantó que los dos ministros van vese nos próximos díes, según Reuters.
Lavrov aseguró qu'esta llamada ye la "preba" de que "Moscú nun ta evitando los contactos con Ankara", magar que les dos partes siguen calteniendo versiones contrapuestes. El Gobiernu rusu niega que la so aeronave violara l'espaciu aereu de Turquía mientres una operación nel norte de Siria.
Según el ministru rusu, Cavusoglu intentó disculpase polo asocedío y alegó que Turquía nun sabía que se trataba d'un caza rusu, informa l'axencia Sputnik. Lavrov tien "series dudes" sobre esta versión y alvirtió de que "la grabación preparada del derribu plantega lo contrario".
"Paez una prevocación entamada", añadió, nuna comparecencia ante los medios na que reconoció que l'incidente va tener consecuencies pa les relaciones con Turquía. Rusia yá encamentó evitar los viaxes a territoriu turcu y va evaluar tolos acuerdus en vigor.
En tou casu, Lavrov descartó un conflictu armáu: "Nun vamos dir a la guerra contra Turquía". Rebaxa asina'l tonu del presidente rusu, Vladimir Putin, que nes hores posteriores al derribu denunció la "puñalada pela espalda" perpetada por "cómplices de los terroristes".
