Rusia espera una "esplicación detallada" sobre'l futuru interceptor de proyectiles d'EE.UU en Rumanía

Reuters

MOSCÚ, 5 de Febreru (EUROPA PRESS)

El ministru d'Asuntos Esteriores rusu, Sergei Lavrov, dixo esti vienres que'l so país espera qu'EE.UU-y dea una "esplicación detallada" sobre'l so plan pa desplegar un interceptor de proyectiles en Rumanía, como parte d'un escudu antimisiles pa protexer Europa.

El presidente rumanu, Traian Basescu, anunció'l xueves l'aprobación per parte del Conseyu Supremu de Defensa d'una propuesta d'EE.UU pa incluyir al país européu nun sistema contra "potenciales ataques con misiles balísticos o proyectiles de mediu algame". "Los interceptores terrestres tarán llocalizaos dientro del territoriu nacional", afirmó.

Tres conocer la noticia, Lavrov dixo que Moscú espera que Washington "dea una esplicación detallada", dao que "el réxime del Mar Negru ta reguláu pola Convención de Montreux". Esta convención de 1936 llenda'l pasu de barcos de guerra polos estrechos del Bósforu y los Dardanelos, controlaos por Turquía.

El ministru añadió que Rusia actúa teniendo en cuenta que "hai un acuerdu ente los dos presidentes sobre l'estudiu conxuntu de les amenaces comunes, cola participación de la Unión Europea". "Dao qu'entendemos qu'hai una interpretación común de les posibles amenaces, ye posible dicir qué midíes se podríen tomar como respuesta", señaló.

Según el Departamentu d'Estáu nortamericanu, ta previsto que pal 2015 tean operatives les nueves instalaciones, que cumplirán una función de defensa frente a "les amenaces actuales y emerxentes de misiles balíticos d'Irán".

El presidente d'EE.UU, Barack Obama, descartó'l plan del so antecesor George W. Bush pa instalar un radar y un interceptor de misiles en República Checa y Polonia y ideó ún nuevu. Aquel proyectu enritó a Rusia, que lu vía como una amenaza al so propiu arsenal nuclear y una intromisión na so esfera d'influencia del este d'Europa.