Salgado reconoz que "sobre'l 50%" de la subida del IVA treslladaráse a los precios

MADRID, 9 de Marzu (EUROPA PRESS)

La vicepresidenta económica, Elena Salgado, reconoció que sobre'l al 50% de la subida del IVA que va empezar a aplicase'l 1 de xunetu va treslladase a los precios, y aseguró nun tar preocupada por que se produza l'efectu redondéu que se rexistró cola llegada del euru.

Sicasí, Salgado, en declaraciones a Onda Cero recoyíes por Europa Press, sorrayó que la elevación d'esti impuestu nun va tener efectos perxudiciales sobre la economía nin va producir qu'a la llarga ésta se ralentice.

La vicepresidenta económica insistió en que, "anque a naide-y presta que se suban los impuestos y qu'al Gobiernu encantara-y nun tener que facelo", la subida del IVA resulta necesaria pa llograr recursos y poder caltener asina los servicios públicos.

"Esta subida va ayudamos a pagar prestaciones sociales y a facer inversiones (...) Los recursos públicos que veníen del sector inmobiliariu nun van volver na mesma midida y hai que reponer esos recursos de la manera más igualitaria posible", dixo.

Salgado, que precisó qu'esta subida del IVA va permitir ingresar 8.000 millones nun añu, repitió que, igual qu'asocedió n'otros países, esta midida va provocar una anticipación del consumu, especialmente de bienes duraderos, nel segundu trimestre del añu, una pequeña recesión del consumu nel tercer trimestre y una recuperación del mesmu nel cuartu. Na media del añu nun va tener efectu", sorrayó.

En cualquier casu, la ministra indicó que, pese a esta subida del impuestu, la presión fiscal va asitiase nel 2013 nel 34%, el mesmu nivel qu'esistía nel 2004, cuando gobernaba'l PP. Los españoles van pagar nel 2013 los mesmos impuestos que nel 2004 con esta subida del IVA, destacó Salgado, que recordó que nel 2007 la presión fiscal taba asitiada n'España nel 37%, el so valor máximu.