UVIÉU, 15 Nov. (EUROPA PRESS) -
Ediciones Saltadera publica'l poemariu 'Hibernia', del autor uvieín Xaime Martínez. Según indiquen dende la editorial trátase d'una obra que va sorprender al llector pola "construcción clásica, el rigor formal, la carga emocional y la broma".
Asina, indiquen que son poemes que revelen la manera de ser d'esti poeta de la que daba los sos primeros pasos creativos, a camín (en palabres de Rodrigo Olay) ente l'academia y la movida, ente l'alta cultura y lo pop, ente distintes tradiciones, llingües y rexistros: nun mesmu poema remana a Bob Dylan con Ausonio y a Catulo con George Lucas, siempre Víctor Botas al fondu.
"Los materiales de Xaime Martínez son tradicionales, pero'l resultáu, clásicu y irreverente, elegante y imprevistu, convencional y novedosu a la vez, ye collecha propia", señala Saltadera.
Xaime Martínez (Uviéu, 1993) forma parte con dellos compañeros de viaxe d'un movimientu lliterariu al que llamen 'Patarrealismo Salvaje'. Col grupu La Bande tien grabaos dos discos, La llamada del hombre ciervo (2015) y Un cadáver exquisito (2016). Escribe n'español y n'asturianu; publicó los llibros de poemes El tango de Penélope (2012) y Fuego cruzado (2014) y los relatos (escritos en colaboración con Diego Álvarez Miguel) del llibru Los tres mil cuentos de Marcelino Tongo (2012).
