UVIÉU, 21 Abr. (EUROPA PRESS) -
Salvamentu Marítimu retoma esti llunes la busca de los dos marineros, d'orixe portugués, que siguen desaparecíos tres el fundimientu del arrastreru 'Mar Nosso', qu'entornó'l pasáu xueves a unes 20 milles de la mariña de Navia.
Nos llabores d'esta quinta xornada prevese movilizar al avión Sasemar 102 y S. Capella pela mañana y el Helimer 211 y el Guardamar Concepción Arenal pela tarde, según información de Salvamentu Marítimu recoyida por Europa Press.
Pa esclariar les causes que motivaron el naufraxu, ta previstu que la Capitanía d'Avilés ponga en marcha una investigación a partir d'esti martes, una y bones esti llunes ye festivu local.
L'accidente, del qu'hai siete supervivientes --cinco gallegos y dos portugueses que yá fueron daos d'alta esti vienres--, causó trés finaos. La tripulación del pesqueru taba compuesta por 12 homes, siete portugueses y cinco gallegos.
Poco dempués del naufraxu y de socorrer a los siete supervivientes, un barcu recuperó los cuerpos de dos marineros portugueses y un terceru foi alcontráu mientres la tarde del xueves.
Mientres la mañana del vienres, seis de los siete marineros ingresaos nos hospitales Mariña de Burela (Llugo) y Jove (Xixón) recibieron l'alta, ente que'l séptimu foi dáu d'alta del hospital xixonés de Cabueñes a lo llargo d'esa mesma tarde.
