San Sebastián acueye un conceyu de la rede europea pa la Promoción de la Diversidá Llingüística la próxima selmana

   La capital guipuzcoana acoyerá la selmana que vien, los díes 18 y 19 de febreru, un conceyu de la rede pa la Promoción de la Diversidá Llingüística (NPLD), na que representantes europeos pondrán en común esperiencies y proyectos sobre llingües como l'eusquera, el catalán, gallegu, irlandés, galés, escocés, estoniu, bretón, occitanu, frisiu, suecu, finalendés, noruegu, lituanu y córnicu.

   El viceconseyeru de Política Llingüística del Gobiernu vascu, Ramón Etxezarreta, presentó güei xunto cola conceyala d'eusquera en San Sebastián, Ainhoa Beola, y la conceyala de la candidatua Donostia 2016, Marisol Garmendia, los detalles del alcuentru, qu'aconceyará a espertos del ámbitu político-alministrativu y científicu en llingües de "dimensión reducida en cuanto a la so estensión", que "reivindiquen el so papel ante les grandes llingües de la Europa multillingüe".

   D'esta manera, les sesiones que se realicen en San Sebastián, que tarán zarraes al públicu xeneral y a los medios, tratarán cuestiones como'l balance presupuestariu del 2009 y los proyectos desarrollaos a lo llargo del añu pasáu, asina como les propuestes pal 2010 y los presupuestos y les llinies de financiación europea pa esti añu.

   Nesti sen, Beola matizó que los representantes "compartirán esperiencies y buenes práctiques" desarrollaes en diferentes rexones europees sobre llingües cooficiales o minoritaries. El Gobiernu vascu, pela so parte, presentará los trabayos relativos al programa HABE nel ámbitu d'enseñanza del eusquera n'adultos, asina como un estudiu realizáu sobre les redes sociales.

   Etxezarreta esplicó que la cita europea tendrá llugar en San  Sebastián "aprovechando la Candidatura a Capital Europea de la Cultura", de la ciudá pal 2016, na qu'ún de los exes principales céntrase na pluralidá llingüística.

   "Toles llingües son ferramientes pa trabayar y vivir, y entendemos meyor los unos colos otros", apuntó Garmendia, que consideró, amás, que San Sebastián tornará, tanto la selmana que vien como nel 2016, "nun espaciu de proyeición internacional pa dar a conocer la Europa plural".

   La NPLD aconceya a estaos, gobiernu autónomu, ONG y organizaciones que trabayen nel ámbitu de la planificación llingüística col oxetivu d'animar a los responsables politicos a promover la diversidá llingüística como valor tresversal. Pa ello, la rede alterna alcuentros dende últimos del 2007 pa intercambiar esperiencies y desarrollar nueves idees nesti campu.