UVIÉU, 27 de Setiembre (EUROPA PRESS)
El secretariu xeneral del PSOE, Pedro Sánchez, aseguró esti martes que nun se plantea dimitir si'l próximu sábadu'l Comité Federal nun apoya la so propuesta de celebrar el 39 Congresu del partíu n'avientu, con unes primaries el 23 d'ochobre.
"Por supuesto que non", respondió'l líder del PSOE cuando, nuna entrevista na Cadena Ser, recoyida por Europa Press, preguntóse-y directamente si va dexar la Secretaría Xeneral nel casu de que los críticos valten la so propuesta'l sábadu.
Sánchez, que reconoció que ye "evidente" que nun tien bona relación con nengún de los presidentes autonómicos del so partíu --sacante la balear Francina Armengol--, nin colos expresidentes Felipe González y José Luis Rodríguez Zapatero, nin colos que se disputaron el 38 Congresu, Alfredo Pérez Rubalcaba y Carme Chacón, insistió en que tienen de falar los militantes pa solucionar l'alderique de "fondu" que, al so xuiciu, traviesa'l PSOE.
"Si hai un congresu, que ye lo qu'espero convocar, "va vese si tengo l'apoyu o non de los afiliaos", dixo, pa dempués sorrayar qu'él, como secretariu xeneral, nun punxo "torgues" a los sos dirixentes autonómicos pa que, dempués de les elecciones del 2015, zarraren acuerdos con otros partíos y pudieren gobernar. "¿Por qué ellos sí y yo non?", preguntóse.
Asina, insistió nos argumentos qu'espunxo esti llunes pa defender la celebración d'esi cónclave y calcó en que "les discrepancies de voces" nel senu del partíu son precisamente "unu de los elementos" que llevaron al PSOE a tener "malos resultaos" dende va cuatro años.
