NUEVA YORK, 25 de Xunetu (EUROPA PRESS)
El senador Bernie Sanders pidió esti llunes el votu pa Hillary Clinton y alvirtió que'l candidatu republicanu, Donald Trump, "ye un peligru pal nuesu país".
"Tenemos qu'escoyer a Hillary Clinton y (al so compañeru de fórmula) Tim Kaine", afirmó Sanders. "Voi facer tolo que puea pa que Donald Trump salga derrotáu", repostió mientres un alcuentru con simpatizantes mientres la Convención Demócrata que se ta celebrando na ciudá de Filadelfia.
Sicasí, los sos simpatizantes respondieron con urriaes a la mención de Clinton y glayaron "¡Queremos a Bernie!". "Hermanos y hermanes. Ésti ye'l mundu real nel que vivimos", argumentó y darréu cargó abiertamente contra Trump por ser un "abusón" y un demagogu".
"Trump ye un peligru pal nuesu país y hai que derrotalu", a lo que dende l'auditoriu respondieron que tamién lo ye Hillary". "¡Robó les primaries!", denunció otru asistente.
El senador y ex precandidatu presidencial demócrata paez atayar col so apoyu a Clinton el discutiniu abiertu'l vienres pola filtración de miles de correos electrónicos del Comité Nacional Demócrata (CND) que demuestren que'l máximu organismu del Partíu Demócrata perxudicó a Sanders en favor de Clinton.
El discutiniu provocó la dimisión de la presidenta del CND, Debbie Wasserman Schultz. "La so dimisión abre la opción d'una nueva dirección al mandu del Partíu Demócrata", apuntó Sanders esti llunes. Esa nueva dirección tien que tar integrada por persones que quieran un cambiu real".
La decisión de Wasserman Schultz de dimitir va ser efectiva cuando acabe la convención demócrata de Florida, en cuatro díes, pero ella mesma renunció a dar el discursu inaugural, como taba previstu. "Decidí que pol bien de garantizar un bon entamu de la convención demócrata nun voi dirixir la convención", apuntó nuna entrevista con un periódicu llocal de Filadelfia.
