Sanidá anuncia que los ensayos de la vacuna de la cocaína van entamar n'España nel 2009

EP

MADRID, 20 de Payares (EUROPA PRESS)

La delegada del Gobiernu pal Plan Nacional sobre Drogues, Carmen Moya, anunció güei que los ensayos clínicos pa estudiar los efeutos de la vacuna de la cocína van entamar n'España a lo llargo del primer semestre del 2009 y ta previsto que participen un total de 164 persones y más de diez hospitales, según añadió demientres la presentación d'un informe sobre cocaína ellaboráu pola Comisón Clínica del so departamentu.

Nesti sen, Moya informó que l'Axencia Europea del Medicamentu (EMEA, nes sos sigles n'inglés) yá almitió'l rexistru pa la investigación del tratamientu inmunolóxicu pa l'adicción a la cocaína, nel qu'España va ser ún de los países que s'ofreció a participar mientres que'l restu tán por confirmar.

L'estudiu en fase IV va tener un añu de duración y el númberu de pacientes y hospitales que van participar nel estudiu ta tovía por confirmar pero, según esplicó Moya, si la vacuna da los sos frutos van resolvese munchos de los fracasos anteriormente esperimentaos con otros tratamientos farmacolóxicos. Según datos del Ministeriu de Sanidá y Consumu ta aumentando la demanda pal desavezamientu del consumu y nel últimu añu se rexistraron más de 22.000 solicitudes de tratamientu en toa España.

En cualquier casu, nun se trata d'un tratamientu preventivu pa los non consumidores, esplicó'l psiquiatra Carlos Álvarez Vara, "a pesar de da-y el nome de vacuna". Los efeutos van dir centraos n'eliminar al traviés del sistema inmunolóxicu los efeutos estimulantes que produz la cocaína de manera que "los pacientes nun perciban nada al consumila, y llamenten tirar el dineru", esplicó.