UVIÉU, 24 d'Abril (EUROPA PRESS)
El director xeneral de Salú Pública, Julio Bruno, propunxo estender la compra centralizada de melecines, que yá s'utiliza pa delles vacunes, a los fármacos antirretrovirales, como métodu pa garantizar "les meyores condiciones de calidá, eficiencia y equidá nos tratamientos del VIH-Sida".
Mientres la inauguración de la Xornada Acción y Voluntariáu ante'l Sida, entamada pol Comité Ciudadanu Anti-Sida d'Asturies, Bruno aseguró que les continues meyores nos tratamientos pa VIH, la incorporación de nuevos fármacos y la comercialización de xenéricos puen desaguar n'estratexes terapéutiques que xeneren situaciones d'inequidá ente los ciudadanos de les distintes comunidaes autónomes.
El director alvirtió tamién "de los efectos negativos que puen derivase de les restricciones d'accesu a l'atención sanitaria incluyíes nel Real Decreto-Llei 16/2012, de 20 d'abril, de midíes urxentes pa garantizar la sostenibilidá del Sistema Nacional de Salú", según indiquen dende'l Gobiernu asturianu en nota prensa.
Nesti sen, destacó que "nenguna persona infectada pol VIH, incluyíos los inmigrantes en situación irregular, tuvo restricciones d'accesu a l'atención sanitaria nin al tratamientu retroviral n'Asturies".
Acordies colos últimos datos epidemiolóxicos, nel 2012 declaráronse n'Asturies 77 nueves infecciones por VIH, lo que supón un descensu de 11,5% al respecto del 2011, un enclín que se caltuvo nel 2013. La principal vía de tresmisión sigue siendo la práctica de relaciones sexuales de riesgu, tanto en pareyes heterosexuales como homosexuales, mientres qu'un 18,2% de les infecciones del 2012 debiéronse al consumu de drogues per vía intravenosa.
Nel 2012 realizáronse 34.760 pruebes convencionales de detección de VIH dende los centros sanitarios y 218 pruebes rápides centralizaes nes dos consultes de referencia pa infecciones de tresmisión sexual. El númberu d'enfermos a tratamientu, según los últimos datos disponibles, quedó esi añu en 2.219. Na última década'l gastu n'antirretrovirales pasó de 7,6 a 16,8 millones.
A lo último, el director xeneral sorrayó la importancia del trabayu preventivu desarrolláu pola Unidá Terapéutica y Educativa (UTE) de Villabona y les asociaciones de voluntariáu nun ámbitu d'especiales característiques epidemiolóxiques, al tiempu qu'espresó la so preocupación "pola posible desapaición d'un modelu de prevención y reinserción pioneru".
