Secuestren a cuatro mozos que presenciaron la matanza d'otros 16 nuna fiesta en Ciudad Juárez

Reuters

MÉXICO DF, 5 de Febreru (EUROPA PRESS)

Cuatro mozos residentes na población de Villas de Sálvacar que presenciaron la matanza d'otros 16 estudiantes la madrugada del pasáu domingu mientres taben nuna fiesta nuna residencia particular de Ciudad Juárez, nel estáu de Chihuahua, siguen desapaecíos y témese que pudieren tar secuestraos.

Residentes de la población dicen que vieron a dellos suxetos sin identificar n'ocho camionetes pela zona y aseguren que llevaron a cuatro mozos, identificaos como Juan Manuel Alcántar Anguiano, de 19 años, Francisco Javier Péres García, de 16, Alejandro López, de 15 y Juan Carlos Villalobos, de 20, informó El Diario.

Los familiares de los desapecíos presentaron una denuncia por desapaición. De fechu, el diariu mexicanu asegura que los suxetos non identificaos obligaron anueche a subir a una de les camionetes tanto a Alcántar Anguino como a la so madre, a la qu'obligaron a dir buscar al so fíu a casa de la güela. Más tarde, los secuestradores lliberaron sicasí a la madre.

POSIBLE RELLACIÓN COLOS 'ARTISTAS ASESINOS'

Anque la Fiscalía federal mexicana desvinculó l'asesinatu de los mozos con disputes ente bandes rivales del crime organizáu y que'l propiu voceru al frente de la operación en Ciudad Juárez, Enrique Torres Valadez, confirmó que nun hai datos pa vincular a los mozos asesinaos col grupu conocíu como los 'Artistas Asesinos', l'alcalde de la población, José Reyes Ferriz, aseguró esti xueves pel contrario que "polo menos ún" d'ellos "tenía actividaes illegales".

"Sí hai información de que polo menos ún de los mozos tenía actividaes illegales", declaró. "Nel so teléfonu celular alcuéntrase-y una semeya con un arma llarga, con municiones y cargadores... son armes que nun usa un mozu, nin siquier un delincuente menor, son armes qu'usen delincuentes mayores, por eso hai esa rellación, pero ye únicamente en rellación con esta persona en particular", esplicó l'alcalde al rotativu 'El Diario'.

Torres Valadez reveló amás nuna entrevista cola canal Primero Noticias que les autoridaes yá disponen de seis retratos de los supuestos autores de la matanza, y negó que les investigaciones tean basándose esclusivamente nel testimoniu del únicu deteníu, identificáu como Óscar Dolors Arroyo y supuesta mano derecha Adrián Ramíres, de nomatu 'El Rama' o 'El 12'. Ramírez, qu'encargare la matanza, morrió esti llunes nun enfrentamientu con efectivos del Exércitu.

No que va d'añu, unes 230 persones morrieron asesinaes en Ciudad Juárez, según cifres espardíes pol voceru de la Suprocuraduría, Arturo Sandoval, en declaraciones a CNN. Ente les víctimes cuéntense 16 adolescentes que taben el pasáu domingu nuna folixa.

Sicasí, el Gobiernu mexicanu refugó esti xueves la presencia d'una misión de la ONU en Ciudad Juárez pa contribuyir a vixilar la seguridá d'una de les ciudaes más peligroses del mundu, asitiada nel estáu de Chihuahua, porque piensa que nun se dan les condiciones pa ello, a pesar de qu'asina lo solicitaron delles ONG.