Siete osos pardos morrieron nel Cordal Cantábricu nos últimos años pola colocación de cebos envenenaos

LUGO, 19 de Payares (EUROPA PRESS)

El presidente de la Fundación Osu Pardu, Guillermo Palomero, aseguró güei que nos últimos años siete exemplares d'esta especie apaecieron muertos nel Cordal Cantábricu --ún en Lugo, tres n'Asturies y otros tantos en Palencia--, por mor de la colocación de cebos envenaos pa eliminar a otros predadores.

Anque matizó qu'estos cebos nun se coloquen pa eliminar a exemplares d'osu pardu, alertó de que provoquen una "auténtica masacre" nesta especie n'estinción, polo que celebró que la Fiscalía del Tribunal Superior de Xusticia de Galicia (TSXG) abriere una investigación pa conocer la utilización de cebos envenenaos en Galicia.

Tamién fizo un llamáu pa evitar esti tipu de práutiques y recordó que la muerte d'un osu pardu por esti motivu pue suponer "multes millonaries" y hasta penes de cárcel. Na mesma llinia se pronuncia'l delegáu provincial de la Conseyería de Mediu Ambiente en Lugo, Eduardo Vidal, qu'alvirtió de que "el que la fai, la paga".

Guillermo Palomero informó de que nos últimos años los montes de Navia de Suarna, Cervantes, Folgoso do Courel y Pedrafita recibieron la visita de polo menos tres exemplares d'osu pardu. Amás, mostró la so "esperanza" de que cada vez más osos se muevan per territoriu gallegu al existir una fema n'Os Ancares lleoneses que yá traxo al mundu a dos manaes d'esbardos, polo que nun descartó que dalguna de les sos fíes acabe por pasar a la zona gallega.