Los sindicatos van dir a una güelga indefinida del tresporte si la patronal nun negocia

UVIÉU, 25 de Mayu (EUROPA PRESS)

Los sindicatos UXT y CCOO d'Asturies mostráronse esti vienres decidíos hai dir a una güelga indefinida del tresporte per carretera a partir del 4 de xunu, si la patronal nun negocia y retira les últimes propuestes en relación al conveniu colectivu del sector, que los sindicatos consideren abusives.

Ello ye que los sindicatos yá convocaren la güelga va unos díes, pero a lo último retiraron el llamáu "por responsabilidá" y na esperanza de llegar a un acuerdu. A día de güei consideren qu'esa retirada, acompañada d'un descensu nes sos demandes, contribuyó a que los empresarios "lo vierene como una debilidá", según esplicó en rueda prensa'l secretariu del sector de Carretera d'Asturies de CCOO, Manuel García.

El dirixente de CCOO protagonizó una rueda prensa, acompañáu pol el so homólogu n'UXT, Florentino Vázquez, en participando nuna asamblea de delegaos d'ambos sindicatos, el que va treslladar a los cerca de 8.000 emplegaos qu'hai nel sector n'Asturies la situación.

Los sindicalistes mostráronse indignaos ante la última propuesta de la patronal del tresporte (compuesta por Car, Astra, Asvipymet, Cesintra y Asetra) qu'inclúi cuestiones como cuatro años sin subida salarial, xornada de cómputu añal, eliminación de los permisos retribuidos o supresión del conceptu d'antigüedá.

Según esplicó Manuel García, los empresarios tamién quieren move-yos los descansos, eliminar delegaos sindicales y obligalos a xustificar les dietes per mediu de factures. "Si'l trabayador saca algo de la dieta ye porque se sacrifica, y nun va comer a restoranes y fumar puros como los empresarios", dixo García.

Tamién s'oponen los sindicatos a la pretensión de los empresarios d'obligalos a realizar, polo menos una vez al añu, un control d'alcohol y drogues. La propuesta de la patronal tamién establez la posibilidá de que la empresa efectúe controles.

Critiquen los sindicatos que quieran promover la figura de 'conductor en desarrollu' mientres 18 meses, que va cobrar menos que los sos compañeros faciendo'l mesmu trabayu mientres tou esi tiempu.

TRAMA

Florentino Vázquez dixo que les pretensiones de los empresarios son propies de 'hooligans', porque los empresarios del sector tán "envalentonados" y hai una instrucción clara dende Madrid p'acabar col conveniu qu'existe n'Asturies pal sector. Asina, faló de "trama política".

Vázquez solicitó la entemediación del próximu Gobiernu asturianu socialista, al tiempu que tuvo crítiques hacia'l partíu Foru Asturies, lideráu por Francisco Álvarez-Cascos. "Mándo-y un saludu a Sostres y a la so familia, y tamién al collaciu Francisco", dixo'l representante d'UXT.

Los sindicatos tán convencíos de que los empresarios "van a por too" no que consideren "la madre de les batalles". Por eso Francisco Vázquez dixo qu'ellos van dar "la batalla de la cordura", y que la patronal "va perder porque nun tien razón".

En tou casu, dexaron claro que la so intención primordial ye nun facer güelga, algo que namás s'evitará si la patronal renuncia a les sos pretensiones. Hai convocada una xunta ente les partes el próximu día 30 de mayu, a les 12.00 hores nel Serviciu Asturianu de Solución Estraxudicial de Conflictos (Sasec).