El socialista Javier Fernández, proclamáu nuevu presidente d'Asturies

UVIÉU, 23 de Mayu (EUROPA PRESS)

El socialista Javier Fernández Fernández resultó proclamáu esti miércoles nuevu presidente d'Asturies por mayoría absoluta, al llograr l'apoyu de los 17 diputaos del so grupu parlamentariu, xunto col votu del diputáu d'UPyD y los cinco d'IU. Foru (12) y PP (10) astuviéronse nun trámite que nun permite votar a la escontra.

El tamién secretariu xeneral de la Federación Socialista Asturiana (FSA-PSOE) tornó asina nel octavu presidente de la comunidá autónoma y xefe del Executivu na IX llexislatura rematando'l procesu entamáu coles elecciones antemanaes del 25 de marzu.

Javier Fernández sustitúi nel cargu al presidente de Foru, Francisco Álvarez-Cascos, dempués de la llexislatura más corta de la historia de la democracia asturiana, na que la falta d'acuerdos ente'l Gobiernu, y la oposición y el refugu a los presupuestos rexonales desencadenaron na convocatoria de nueves elecciones meses dempués de les elecciones ordinaries.

Pa salir investíu, el presidente socialista pactó un acuerdu de llexislatura con UPyD y un acuerdu d'investidura con IX, formación que va decidir esti xueves en referéndum la entrada o non nel nuevu Executivu. La toma de posesión de Javier Fernández, qu'agradeció l'apoyu llográu y llamentó nun poder adelantrar la composición del nuevu Gobiernu, va celebrase esti sábadu na Xunta Xeneral d'Asturies.