MADRID, 21 de Payares (EUROPA PRESS)
El ministru d'Industria, Comerciu y Turismu, José Manuel Soria, considera que les prospecciones turístiques en Canaries puen afectar al sector turísticu, pero "favorablemente", pola presencia nes isles de los trabayadores de les empreses y los sos familiares.
En declaraciones a la COPE recoyíes por Europa Press, Soria argumentó que, dende va años llega dacuando a los puertos canarios una plataforma qu'opera na costa africana y pasa ellí --en Santa Cruz de Tenerife o en Les Palmes-- dos o trés meses nos que los trabayadores reciben visites de los sos familiares.
Eso, calcó, xenera empléu na industria naval --poles xeres d'arreglu y caltenimientu-- y tamién n'hoteles, restoranes y tresportes. Soria recordó que Canaries nun ta "sobrada d'empléu", dao que tien una tasa de paru del 33 por cientu y del 50 por cientu ente los mozos. "Nun tamos pa permitimos determinaos lluxos", dixo.
El ministru espresóse asina en valorando positivamente los datos de visites turístiques internacionales nel mes d'ochobre, qu'aumentaron un 7,8 por cientu respectu al mesmu mes del 2013. Ente xineru y ochobre entraron n'España 58,3 millones de turistes, un 7,5 por cientu más que nel mesmu periodu del añu pasáu, y según Soria eso va permitir terminar l'añu con unos 63 millones de visitantes, 3 millones más qu'en 2013, un récor históricu.
Con tou, Soria reconoció que'l gastu per cápita d'esos turistes ye llixeramente inferior y por eso punxo en valor l'acabante presentase plan pa incentivar el turismu de compres, dedicáu a los turistes que tienen más poder alquisitivo, como los procedentes d'Asia.
Pa los oxetivos d'esi plan destacó qu'ente xineru y ochobre'l turismu procedente d'Asia creció casi un 25 por cientu, y en concreto un 33 por cientu el procedente de Xapón, un 50 por cientu'l de Corea'l Sur y un 18 por cientu'l de China.
