Suatea exixe la salida definitiva de l'asignatura de relixón del horariu del bachilleratu

UVIÉU, 12 de Mayu (EUROPA PRESS)

El sindicatu Suatea aseguró güei que "ún de los escasos aspeutos positivos, sinón l'últimu, de la propuesta de borrador del nuevu currículu de Bachilleratu p'Asturies, ye la contemplación de la docencia de relixón como materia optativa y fuera del horariu habitual". Por ello llamentaron que "la presión del 'lobby' de les sotanes y los devotos ta siendo mui fuerte", y exixeron la salida definitiva de l'asignatura del horariu del bachilleratu.

Al traviés d'un comunicáu, Suatea manifestó que "esi 'lobby' constituyíu pol conxuntu de sectores, instituciones y intereses católicos saltaron como un resorte, avezáu como ta a caltenese en situación de privilexu", en cuanto se conoció la propuesta.

Asina llamentaron que la presión del mundu católicu tuviera ya los sos frutos nes vecines comunidaes de Cantabria, onde se quitó una hora llectiva selmanal a Historia d'España y en Galicia, onde en primer cursu s'amenorga la Educación Física a una sola hora selmanal y Filosofía y Ciudadanía pasa de tres a dos, mientres qu'en segundu eliminen la tutoría, pese a la importancia que tien de cara a les P.A.U. y la orientación universitaria. Al mesmu tiempu, "vuelve entrar" una hora de relixón en primeru y otra en segundu.

El sindicatu manifestó amás que nun tien d'escaecer que lleva años falando de la baxa preparación de munchos universitarios por un bachilleratu d'insuficiente calidá y llamentó que vuelva al importante disparate de continuar incluyendo una "asignatura doctrinaria".