MANILA, 3 de Xunetu (Reuters/EP)
Les autoridaes de Filipines suspendieron esti vienres por mor del mal tiempu los llabores de rescate tres el naufraxu d'un ferry nel que viaxaben más de 170 persones na ciudá filipina d'Ormoc, na provincia de Cebú, socesu que se saldó pel momentu con 41 muertos.
La Guardia Costera y la Policía afirmaron que nestos momentos otres doces persones siguen desapaecíes, sorrayando que les grandes foles y les fuertes corrientes torguen que los buzos puean siguir colos sos trabayos de busca.
Según un mediu llocal, que cita fontes de los Guardacostes nel mandu de Visayas Occidental, el ferry, 'MV Kim Nirvana-B', volcó unos diez minutos dempués de salir de puertu tres alcontrase con grandes foles. Coles mesmes, un sobreviviente indicó que la embarcación diba cargada con cientos de sacos de cementu y arroz.
El comandante de los Guardacostes en Visayas Oriental, capitán Pedro Tinampay, indicó que los finaos llevaben el chalecu salvavides y que morrieron al quedar atrapaos baxo'l cascu.
