Tantawi promete qu'alcontrará a los culpables de los enfrentamientos en Port Said

EL CAIRU, 2 de Febreru (EUROPA PRESS)

El xefe del Conseyu Supremu de les Fuerces Armaes d'Exiptu, Mohamed Hussein Tantawi, prometió que va alcontrar a les persones que tán detrás de los enfrentamientos violentos que provocaron polo menos 73 muertos dempués de que siguidores de dos equipos de fútbol s'enfrentaren esti miércoles al cabu d'un partíu na ciudá exipcia de Port Said, nel nordeste del país.

"Esti tipu de socesos puen pasar en cualquier parte del mundu, pero nun vamos permitir que los que tán detrás escapen", dixo Tantawi en declaraciones a la canal de televisión deportiva propiedá del Al Ahly, ún de los equipos implicaos. Coles mesmes, apuntó que les víctimes van recibir una compensación dempués de que los sos casos s'examinen.

"Vamos superar esta etapa. Exiptu va ser estable. Tenemos una fueya de ruta pa tresferir el poder a civiles electos. Si alguién ta tratando de xenerar inestabilidá n'Exiptu, nun va tener éxitu. Caún va tener lo que se merez", manifestó, antes d'añadir que la seguridá del partíu yera responsabilidá de la Policía.

La griesca entamó al cabu'l partíu ente los equipos Al Masry y Al Ahly, qu'acabó col resultáu de 3-1 favorable a los primeros. Los siguidores del Al Masry invadieron el campu tres un encruz d'insultos mientres l'alcuentru y corrieron tres los xugadores del equipu visitante, lo que derivó nun enfrentamientu ente los dos hinchaes.

La mayoría de los muertos aparentemente produxéronse por mor de la estampida que se xeneró y que provocó múltiples aplastamientos y asfixes, según testigos consultaos por Reuters que tamién relataron que delles persones cayeron dende les graes. Ente les víctimes mortales tamién hai policíes.