Aviso: Esta noticia tiene más de un año. Última actualización: 15/07/2009 18:39
La televisión autonómica de Castiella y Lleón estrenó esti mes de xunetu un informativu en llingua lleonesa, o 'llïonés', perteneciente al mesmu dominiu que l'asturianu, que se ta emitiendo los sábados, a les 20.15 y los llunes a les 10.30.
Así lo informó la Conceyalía de Cultura del Ayuntamientu de Lleón, instancia que firmó un acuerdu cola televisión de l'autonomía vecina pa entamar esti espaciu informativu, que tien el nome de 'Xornal Informativu en Llingua Llïonesa'.
Según esplicó'l conceyal de Cultura, el lleonesista Abel Pardo, la televisión encárgase de la parte técnica y periodística, señalando les informaciones más importantes de la selmana que van ofrecese nel Xornal Informativu, y realizando la parte visual y los montaxes. Pela so parte, la Conseyería de Cultura Lleonesa encárgase de realizar les traducciones a la llingua lleonesa de les informaciones qu'apaecen nel Xornal Informativu y de les persones que ponen voz a les noticies.
El programa va tar n'audiencia hasta'l cabu d'esti añu, anque nun se descarta incrementar les sos frecuencies y conteníos "si l'audiencia respuende". L'edil señaló qu'esti acuerdu ye "mui satisfactoriu pa les dos partes, pues llogramos con una alta calidá técnica y llingüística que vien a satisfacer una demanda de la sociedá que reivindicaba que la llingua lleonesa tuviere presente nos medios de comunicación, y la TVCyL recoyó'l guante ofreciendo a los sos espectadores esti Xornal Informativu, pioneru na información de calidá en 'llionés' na televisión.
Pardo recordó tamién qu'en menos d'un mes presentóse la enciclopedia en Llingua Llïonesa Llionpedia y esti nuevu informativu.