El temporal de fríu qu'afecta al este d'Europa dexa yá 110 muertos

MADRID, 2 de Febreru (EUROPA PRESS)

Unes 110 persones morrieron nel este d'Europa, principalmente n'Ucrania, de resultes del temporal de fríu qu'afecta a tola zona dende hai díes, según los nuevos balances que publicaron esti xueves les autoridaes de los distintos países.

La muerte d'otres 20 persones n'Ucrania eleva a 63 el númberu de víctimes mortales nesti país, mientres qu'en Polonia yá son 29 los finaos tres la inclusión na llista d'otros nueve. N'esti país, los termómetros llegaron a cayer hasta los 30 graos baxo cero.

Sicasí, les temperatures más fríes rexistráronse en zones de Rusia y Kazakstán, según informaciones de los medios llocales recoyíes pola cadena británica BBC. Nos Urales y en Siberia, la temperatura baxó hasta los 40 graos negativos, mientres que na capital kazaquistanina, Astaná, el vientu fizo que la sensación térmica seya de 52 graos baxo cero, pese a que los termómetros marcaben 35 graos baxo cero.

Pela so parte, les autoridaes serbies dixeron qu'unes 11.000 persones quedaron atrapaes poles nevaes cayíes en delles zones apartaes, igual que más de 600 pasaxeros d'un tren que quedaron bloquiaos n'Italia, nos Apeninos, dempués de que se conxelaren los frenos y los cables eléctricos. Los meteorólogos yá dixeron que les nevaes cayíes nel centru y el norte d'Italia fueron les peores en 27 años.

Per otra parte, la ciudá turca d'Istambul rexistró ayeri hasta 50 centímetros de nieve. Un argayu de nieve na zona sureste del país causó la muerte d'una muyer na so propia vivienda, mientres qu'otru dexó bloquiada la principal carretera que comunica les provincies de Bitlis y Diyarbakir.

N'Alemaña, les autoridaes informaron de la muerte d'una muyer mayor que fuera nadar a les agües xelaes d'una zona d'estracción de grava en Baxa Saxonia. La muyer avezaba a acudir a estes agües a realizar los sos exercicios.