UVIÉU, 27 de Xineru (EUROPA PRESS)
El conseyeru d'Economía y Empléu, el socialista Graciano Torre, afirmó esti martes que desconoz la procedencia de la supuesta fortuna del líder mineru José Ángel Fernández Villa. "Nun sé más que lo que los medios de comunicación dixeron y especularon sobre d'ónde podía venir", respondió na comisión d'investigación de la Xunta Xeneral del Principáu d'Asturies (XXPA) qu'investiga lo asocedío según la xestión de los fondos mineros.
La comisión creóse por una información del diariu El País publicada n'ochobre na que s'afirmaba qu'a Villa taben investigándolu por tapecer a Facienda 1,5 millones d'euros. Villa yera un referente del movimientu sindical mineru. Tamién formara parte del comité executivu del PSOE y de la executiva rexonal de la FSA-PSOE, amás de ser diputáu rexonal. Al sindicalista espulsáronlu del PSOE y d'UXT, igual qu'al presidente del Montepío de la Minería, José Antonio Postigo.
Torre esplicó cómo s'enterara de la noticia de que Villa s'acoyera a una amnistía fiscal. "Taba viendo la canal 24 Hores de TVE que fai'l resume de los medios nacionales del día siguiente y llevé un respigu, a partir d'ehí tiré d'Internet intentando buscar información; asina m'enteré", comentó.
El dirixente asturianu nun entiende que Villa regularizara 1,4 millones d'euros per mediu de l'amnistía fiscal, nin que'l sindicalista nun lo esclarara. "Ye una actitú ablucante y poco ética", recalcó.
A preguntes de los miembros de la comisión, Torre manifestó que nes xuntes de les comisiones rexonales de la minería nun apreció nengún tipu d'interés especial per parte de Villa, tocantes a algún proyectu concretu, tampoco no referente a la residencia de Montepío de la Minería, en Felechosa. "Nunca se recibió nenguna denuncia, si llegaron a otres conseyeríes desconózolo", esplicó.
"Nun me consta", respondió a preguntes sobre la posible existencia de pagos de comisiones a miembros d'aquelles meses. Los sos integrantes nun recibíen remuneración dalguna per parte del Principáu. Torre desconoz si se fizo de dalgún otru pagador.
Per otru llau, nes so respuestes a los miembros de la comisión, Torre defendió'l llabor del so Gobiernu, del que ye conseyeru dende l'añu 2001, en relación a los denominaos 'fondos mineros'. Reconoció que, anque'l sistema de xestión podría considerase meyorable, supunxeron una meyora pa les comarques mineres.
"Yo soi de la cuenca minera y ellí tenemos memoria de la situación, de cómo taben les barriaes y los equipamientos nos años noventa y lo qu'hai güei", manifestó. Los problemes, manifestó puen derivase del sistema y de determinaes dilaciones o cambios favorecíos, por exemplu, de que se firmaren los convenios antes de facese los proyectos.
Torre, manifestó que nel primer plan de la minería, el de 1997-2005, figuraba un anexu d'inversiones y proyectos. Nel segundu plan de la minería, el 2006-2012 establecía que los proyectos teníen que consensuase na mesa rexonal de la minería, con presencia de sindicatos, representantes de los conceyos mineros y el Gobiernu del Principáu.
Cuando había dalguna discrepancia, resolvíala l'Institutu del Carbón. Ési foi'l motivu, por exemplu, de que nun salieren alantre proyectos que propunxera'l Gobiernu asturianu, como'l tren-tran', relató Torre.
