UVIÉU, 25 de Payares (EUROPA PRESS)
Un total de 5.247 asturianos residentes nel estranxeru solicitaron exercer el so derechu a votu nes próximes elecciones xenerales del 20 d'avientu, según datos de Censu Electoral Residentes Ausentes.
Les cifres diéronles a conocer la publicación España Exterior y Marea Granate, un día primero que se zarrar'l plazu de solicitúes, el pasáu 21 de payares.
La cuantía representa un 4,8% del total del censu de residentes ausentes asturianos (108.916), y ye dalgo inferior a la rexistrada nos comicios xenerales del 2011, cuando se contabilizaron 5.978 solicitúes. Según estos datos, Asturies sería la cuarta provincia con más solicitantes, dempués de Madrid (24.209), Barcelona (11.515) y A Coruña (6.113).
En total, 115.055 españoles residentes nel estranxeru solicitaron exercer el so derechu al votu, un 6,11% del total 1.880.026. El movimientu Marea Granate considera que se produxo un "pucherazu electoral", per mediu de torgues burocrátiques pa enzancar la solicitú de votu a los que viven n'otros países.
D'equí p'alantre, los plazos del procesu son los siguientes: hasta'l 30 de payares, los solicitantes deberán de recibir la documentación; hasta'l 8 d'avientu deberán de recibir el votu per corréu; y ente'l 16 y el 18 d'avientu tendrán de depositar el so votu nes urnes.
