UVIÉU, 28 d'Ochobre (EUROPA PRESS)
Los trabayadores de Mieres Tubos, perteneciente al Grupu Condesa, convocaron una concentración, a la que tán llamaos el centenar de trabayadores de la empresa, pa les diez de la mañana d'esti miércoles 29 d'ochobre frente a la Conseyería d'Economía y Empléu del Principáu d'Asturies pa reclamar soluciones pa la crítica situación que traviesa la empresa.
La concentración coincide cola xunta que dellos miembros del Comité d'Empresa xunto con responsables de les federaciones de Metal, Construcción y Afines d'UXT y CCOO d'Industria d'Asturies, van caltener col Director Xeneral d'Industria, Luis Angel Colunga.
Mientres esi alcuentru'l Comité d'Empresa volverá incidir na necesidá de desbloquiar la crítica situación que traviesa la empresa. Tamién-y van treslladar al responsable d'Industria la urxencia d'acometer un plan industrial que garantice la continuidá de l'actividá y el caltenimientu del empléu, informaron los trabayadores nun comunicáu.
La principal actividá de Mieres Tubos ye la fabricación de tuberíes de conducción, valles de seguridá metáliques, según accesorios o derivaos d'elles. Amás, les instalaciones del Grupu Condesa en Mieres tamién cuenten con una llinia de galvanizáu.
