Tráiler de 'The Wolf of Wall Street': DiCaprio vuevel al escesu de la mano de Scorsese

MADRID, 17 de Xunu

Yá tenemos equí'l primer tráiler de 'The Wolf of Wall Street', la nueva cinta de Martin Scorsese que vuelve tar protagonizada por Leonardo DiCaprio y que lleva a la gran pantalla les memories del broker Jordan Belfort.

Si hai poco pudimos ver a DiCarpio arrodiáu de los escesos -visiuales y musicales- de 'El gran Gatsby' de Baz Luhrmann, nesti primer adelantu tamién apaez somorguiáu nun frenéticu y opulentu ritmu de vida. Y ye qu'en 'The Wolf of Wall Street' DiCaprio interpreta a un trunfador corredor de bolsa que, en faciendo una gran fortuna en Wall Street, acabó colos sos güesos nuna prisión federal, acusáu de manipular valores bursátiles na década de los noventa.

El repartu de 'The Wolf of Wall Street' completóse con otres cares conocíes como les de Jonah Hill, nomáu al Oscar por 'Moneyball: Rompiendo las reglas', y Matthew McConaughey, que caltién una pintoresca conversación nun restorán col personaxe de DiCarpio que, simplemente, nun tien desperdiciu.

Esta ye la quinta vez que Scorsese y DiCaprio trabayen en comuña. Yá collaboraron n'otres cuatro películes: 'Gangs of New York' (2002), 'El aviador' (2004), 'Infiltrados' (2006) y 'Shutter Island' (2010). La cinta ta producida por Appian Way, la empresa de DiCaprio, xunto con Alexandra Milchan y el mesmu director, Martin Scorsese.