Diz que los inmigrantes van tener que permanecer en territoriu nacional hasta qu'escosen les víes llegales pa recurrir esta decisión
MADRID, 22 Abr. (EUROPA PRESS) -
El Tribunal Européu de Derechos Humanos (TEDH) obligó a España a caltener nel territoriu nacional a 30 saharagüis a los que se refugó conceder asilu, y que demandaben al Estáu por non llograr respuesta a los pidimientos que plantegaron a los tribunales españoles.
La sentencia del tribunal européu establez que nun van poder ser espulsaos "hasta que se produza una decisión definitiva sobre les sos demandes de protección internacional". Los demandantes consideren que nel so casu se frayaron los artículos 2 (derechu a la vida), 3 (prohibición de tratos inhumanos o degradantes) y 13 (derechu a un recursu efectivu), del Conveniu Européu de Derechos Humanos.
Nel so recursu ante'l tribunal con sé n'Estrasburgu alegaron qu'escaparon d'un campu del Sáhara Occidental dempués de qu'ésti fuera atacáu brutalmente pola policía marroquina y que llegaron en barcu a Canaries ente xineru de 2011 l'agostu de 2012.
A la so llegada a España solicitaron asilu, pero esta protección foi-yos refugada pol Gobiernu. Los sos recursos alministrativos contra esta decisión fueron refugaos igualmente de forma sistemática, polo que consideren que los sos derechos fundamentales viéronse frayaos.
NUN S'ESCOSARON LES VÍES LLEGALES
"El Tribunal reparó que nun s'agotaron les víes llegales de recursu contra'l refugu del asilu na xurisdicción nacional" polo que --diz-- "la Xusticia nun tuvo entá ocasión de pronunciase de forma definitiva"
El TEDH establez que "l'Estáu español va deber de garantizar, xurídica y materialmente, la estancia de los demandantes nel territoriu español mientres l'exame de les sos causes y hasta qu'esista una decisión definitiva sobre les sos demandes". Considera qu'España violó l'artículu 13 del Conveniu Européu de Derechos Humanos que garantiza'l derechu a un recursu efectivu ante una instancia nacional.
