La troika, preocupada pola evolución del creitu n'España

MADRID, 23 de Mayu (EUROPA PRESS)

Los inspectores de la troika -formada por la Comisión Europea, el Bancu Central Européu y el Fondu Monetariu Internacional- tán treslladando a les entidaes financieres españoles la so "máxima preocupación" pola situación del creitu n'España, que sigue sin afluyir y nun actúa como motor de l'actividá económica, según informaron a Europa Press fontes enteraes de los alcuentros.

La troika caltién dende esti martes contactos colos responsables de la banca española, nel marcu de la so tercer misión d'evaluación del rescate bancariu d'España. "La troika ta bien, bien preocupada pola evolución del creitu", remarcaron les fontes, que sorrayen que los miembros de la CE, el BCE y el FMI tán sondiando a les entidaes pa conocer qué midíes podríen valir pa promover la financiación hacia la conocida como economía real (empreses y families), sobremanera dirixida a les pymes.

Na misión tán participando tamién espertos de l'Autoridá Bancaria Europea (EBA, poles sos sigles n'inglés) y del Mecanismu Européu d'Estabilidá (MEDE). Con éses les autoridaes europees y internacionales alvierten que la salida de la crisis n'España namás va cristalizar si la concesión de creitu normalízase. La banca centró tolos sos esfuerzos nos últimos años en saniar los sos balances.

Los inspectores yá se reunieron con delles de les grandes entidaes españoles, a les que-yos tresmitieron les sos dudes sobre dellos aspectos de los sos negocios. Tres los nuevos criterios del Bancu d'España pa clasificar les refinanciaciones, la troika tamién ta preguntáu sobre estes carteres.

El supervisor calcula que les refinanciaciones y reestructuraciones del sector financieru español algamaron un importe de 208.206 millones d'euros a avientu del 2012. Precisamente, a partir d'estos nuevos criterios y coincidiendo cola visita de la troika, dende'l mercáu especúlase con que la banca española tenga que realizar nueves provisiones, lo que podría derivar en nueves ayudes públiques.

Nesti sen, el presidente del Gobiernu, Mariano Rajoy, refugó solicitar más de los 40.000 millones yá pidíos al MEDE y que veníen de la llinia de creitu d'hasta 100.000 millones facilitada por Bruxeles pa recapitalizar la banca española. Esta llinia de financiación acaba a últimos d'esti añu.