WASHINGTON, 22 Jun. (Reuters/EP) -
El presidente d'Estaos Uníos, Donald Trump, ordenó esti xueves al so Gobiernu que principie'l procesu de reunificación de les families de migrantes que separaron a la so llegada a la frontera con Méxicu.
Nuna xunta de Gabinete na Casa Blanca, Trump pidió a los departamentos de Xusticia, Seguridá Nacional y Sanidá y Asuntos Sociales "trabayar xuntos pa caltener a les families de migrantes illegales xuntes nel procesu migratoriu y reunificar a les que yá foron separaes".
Trátase de la primer orde pa implementar el decretu executivu firmáu'l miércoles por Trump pa poner fin a la separación de los neños migrantes de los sos padres, en respuesta a les crítiques qu'esta midida xeneró na comunidá internacional y tamién n'Estaos Uníos.
"Ye la política d'esta alministración caltener la unidá familiar, incluyendo la detención de les families d'estranxeros xuntos cuando sía apropiáu y tea d'alcuerdu cola llei y colos recursos disponibles", señala'l testu firmáu por Trump.
El mandatariu norteamericanu esclarió coles mesmes qu'esto nun supón derogar la política de Tolerancia Cero cola inmigración illegal. Sicasí, fontes gubernamentales citaes pol 'Washington Post' revelaron esti xueves que la Casa Blanca va suspender los procesos xudiciales contra los padres de neños migrantes.
Entrugada sobre esti asuntu por Reuters, la portavoz del Departamentu de Xusticia, Sarah Isgur Flors, llindóse a contestar que la información del diariu norteamericanu nun ye precisa. "Nun hubo nengún cambiu na política de Tolerancia Cero de procesar a los adultos que crucien illegalmente la nuestra frontera", dixo, ensin referise a los que lleguen acompañaos de neños.
Unos 2.000 menores d'edá foron separaos de los sos padres y enzarraos nes últimes selmanes pola política del Departamentu de Seguridá Nacional de separar a les families na frontera sur.
