WASHINGTON, 20 de Xineru (EUROPA PRESS)
El presidente electu d'Estaos Uníos, Donald Trump, qu'esti mesmu vienres va asumir el cargu, prometió a los sos siguidores que mientres el so mandatu nun habrá más homes y muyeres escaecíos, tal como yá fizo mientres la so campaña.
Nel conciertu de bienvenida celebráu esti xueves de nueche na escampada xunto al monumentu d'Abraham Lincoln en Washington, Trump dirixóse a los presentes definiéndose a sí mesmu como "el mensaxeru" de tou un movimientu y como'l defensor de los olvidaos.
"Esti viaxe empezó va 18 meses", señaló, en referencia al momentu en qu'anunció formalmente la so candidatura a la Presidencia d'Estaos Xuníos, en xunu del 2015. "Toos tábamos cansaos de ver lo que taba pasando y queríamos el cambiu, pero un verdaderu cambiu", defendió.
Mientres la so intervención tres el conciertu --nel que se negaron a participar numberoses estrelles del panorama musical estaounidense--, Trump recordó que mientres la so campaña comprometióse a defender a los homes y muyeres olvidaos. "Con éses, yá nun vais ser los olvidaos nunca más. Pueo dícivoslo yá: nunca más olvidaos", repitió.
Dende'l memorial de Lincoln, onde de primeres fizo un homenaxe a los soldaos cayíos, repitió que mientres el so mandatu va facer "a Estaos Uníos más grande" --en referencia al so lema de campaña--, "más grande de lo que foi nunca".
El magnate neoyorquín va asumir el cargu de presidente d'Estaos Uníos, dempués de vencer al so rival demócrata, la ex secretaria d'Estáu Hillary Clinton, nes elecciones del 8 de payares.
La vixésima Enmienda de la Constitución estaounidense establez que'l mandatu de cada presidente empieza a mediudía del 20 de xineru del añu posterior a la celebración d'elecciones. D'esta forma, Trump va tornar esti vienres, de magar les 12.00 (hora llocal) nel presidente númberu 45 d'Estaos Uníos.
