SAN SEBASTIÁN, 4 de Febreru (EUROPA PRESS)
El Tribunal Supremu (TS) de Florida (EEUU) anuló la condena a pena de muerte del guipuzcoanu Pablo Ibar, que lleva 21 años presu nuna cárcel del citáu estáu, 15 d'ellos nel corredor de la muerte, pol asesinatu en 1994 de dos modelos y el dueñu d'un llocal nocherniegu de los qu'él se declara inocente, y ordenó que se lleve a cabu un nuevu xuiciu.
Nun comunicáu, l'Asociación contra la Pena de muerte de Pablo Ibar destacó que con esta decisión "por fin ábrese un camín, el camín a qu'Ibar puea demostrar la so inocencia".
El TS de Florida, nuna decisión tomada por cuatro votos contra trés, decidió anular la declaración de culpabilidá d'Ibar y poro, la so condena a muerte, y ordenó la repetición del xuiciu.
En tou casu, l'asociación esplicó qu'esta decisión nun ye definitiva, dao que l'Estáu de Florida pue tovlía apelar, daqué que ve "bien probable", bien en recursu de reposición ante'l mesmu Tribunal Supremu de Florida, bien inclusive ante'l Tribunal Supremu de los Estaos Uníos.
Ibar taba condenáu a muerte por un triple asesinatu, que niega cometer. A últimos de xunu de 1994 la policía entró nuna casa de la población de Mirarmar, nel Estáu de Florida y topó los cuerpos sin vida del propietariu de la casa, Casimir Sucharski, dueñu d'un llocal nocherniegu, y dos de les sos bailarines, Sharon Anderson y Marie Rodgers. La consiguiente investigación remató na acusación formulada'l 25 d'Agostu de 1994 contra Seth Peñalver y Pablo Ibar.
El primer xuiciu contra los dos acusaos celebróse en Fort Lauderdale, Florida, el 5 de mayu de 1997, declaróse nulu'l 25 de xineru de 1998 al nun ponese d'acuerdu el xuráu sobre un veredictu nel casu. Amás, el 11 de xineru de 1999 entamóse un segundu xuiciu.
MOCIÓN
Mientres la fase de selección del xuráu, al abogáu d'oficiu asignáu a Ibar arrestáronlu acusáu d'agredir a una muyer embarazada nun incidente de violencia doméstica. L'acusáu presentó una moción de cese del abogáu, refugada pol tribunal y otra moción solicitando un aplazamientu del xuiciu que s'aprobó. El xuiciu de Seth Peñalver siguió y resultó condenáu a muerte.
El tercer xuiciu de Pablo Ibar entamó'l 17 d'abril del 2000, y el xuráu declarólu culpable'l 14 de xunu, entamándose la fase de determinación de la pena'l 24 de xunetu de 2000, qu'acabó cola condena a muerte d'Ibar.
L'asociación recuerda que nin les buelgues dactilares, nin l'ADN recoyíu nel llugar del crime coinciden coles buelgues d'Ibar y la so acusación básase principalmente nun videu de videovixilancia nel que se ve una cara difuminada con bien poca resolución y fuertes contrastes llumínicos.
