UVIÉU, 20 d'Ochobre (EUROPA PRESS)
La sala de lo Contencioso-Alministrativo del Tribunal Superior de Xusticia d'Asturies (TSXA) dictó una sentencia pola qu'estima parcialmente un recursu de Foru Asturies y anula l'artículu 4 del decretu del Gobiernu asturianu que regula l'aplicación de la prórroga de los Presupuestos Xenerales del Principáu d'Asturies pal 2013 mientres l'exerciciu 2014.
En concreto, l'artículu anuláu ye'l relativu a la financiación de los creitos prorrogaos y diz: "prorróguense les previsiones iniciales del estáu d'ingresos previstes na Llei del Principáu d'Asturies 3/2012, de 28 d'avientu, de Presupuestos Xenerales del Principáu pa 2013, incluyida la emisión de deuda o formalización d'operaciones d'endeuidamientu, en cualquier modalidá". El TSXA entiende qu'esti artículu nun s'axusta a Derechu.
El Gobiernu del Principáu d'Asturies tien diez díes pa recurrir interponiendo'l correspondiente recursu de casación ante la Sala de lo Contencioso-Alministrativo del Tribunal Supremu.
El TSXA argumenta que la prórroga del presupuestu "nun pue algamar aquelles operaciones que yá s'agotaren, nin aquélles qu'acabaren la so vixencia col mesmu presupuestu y estiéndese, pola mesma causa de la prórroga, a les autorizaciones de creitu y a la emisión de deudes sin individualizar en cuantes que se integren como un tou nel presupuestu".
