UVIÉU, 26 de Xunetu (EUROPA PRESS)
El Tribunal Superior de Xusticia d'Asturies declaró la nulidá completa del Decretu pol que s'aprobaba'l primer Instrumentu de Xestión Integráu (IXI) de dellos espacios protexíos de la Montaña Central Asturiana y que declaraba Zones d'Especial Caltenimientu Ayer-L.lena, Caldoveiru, Montoubu-La Mesa, Peña Manteca Xinestaza, Valgrande, amás del Parque Natural Ubiñes-La Mesa.
El despachu Pilar Martínez Abogaos informó en nota de prensa d'esta sentencia. Actuó en representación de la Parroquia Rural de Páramu, presidida por Ángel Llagar Patallo (Teberga).
Según informa la nota, el TSXA estimó dos de les principales causes argumentaes pola abogada: "la falta de memoria económica y la falta, dientro del plan de desarrollu sostenible del IXI, d'actividaes añales, oxetivos y llinies maestres d'actuación, lo mesmo que d'inversiones". "La sentencia incide y tuvo en cuenta dos de les causes de nulidá qu'afecten directamente al desarrollu social y económico de la zona y constituyíen por ello una de les mayores preocupaciones pa la Parroquia Rural de Páramo", esplicó l'abogada Pilar Martínez.
La lletrada destaca que "la consecuencia práctica" de la resolución xudicial, "amás de la nulidá completa d'un decretu descomanadamente restrictivu pa los intereses d'estos conceyos y los sos habitantes, residentes, empresarios y vecinos polo xeneral" ye que'l nuevu instrumentu de xestión que se redacte "tendrá que contar ineludiblemente, per un llau, con una memoria económica qu'incluya partíes presupuestaries reales pa facer frente a les compensaciones ya indemnizaciones poles restricciones qu'esti instrumentu supón pa los derechos individuales de primeres consolidaos y, per otru llau, con un real y efectivu plan añal d'inversiones pa les zones afectaes", tal como venía invocando esta Parroquia nos sos repitíos intentos de diálogu col Principáu.
La sentencia, señala la nota, "supón l'anulación completa del decretu y, con ello, non solo la nulidá de la declaración de les ZEC mentaes, sinón tamién del instrumentu de xestión de los espacios protexíos de tola Montaña Central d'Asturies". "Ye la segunda vez que la Parroquia Rural de Páramo llogra la nulidá del Plan Rector d'Usu y Xestión del Parque Natural Ubiñas La Mesa, que "nunca llegó a tener un instrumentu de xestión válidu", añadió.
