UVIÉU, 28 de Payares (EUROPA PRESS)
El Tribunal Superior de Xusticia d'Asturies (TSXA) matizó que la madre de les dos neñes asesinaes en L'Arena, nel conceyu asturianu de Sotu'l Barcu, a manes del so padre, pidió nel 2013 una orde d'alloñamientu contra la so pareya, y non de protección como informó deprimeres esta mañana'l conseyeru de Presidencia, Guillermo Martínez. El xulgáu refugó'l pidimientu.
El Tribunal quier esclarar asina que'l 13 de mayu del 2013 abriéronse unes dilixencies previes nel xulgáu de Pravia pola una denuncia por unos posibles malos tratos leves nel ámbitu familiar.
La denunciante calcó nel so relatu en que nun hubo agresión física dalguna, nin mientres l'incidente nin antes, que fueron namás insultos nun discutiniu mui subíu de tonu, pero nun presentaba parte algún de lesiones, nin consideraba que la so pareya fuera un home violentu, nin con ella nin coles dos fíes que teníen en común, anque sí manifiestó que dende diba un tiempu los discutinios d'esti tipu repitiérense.
La so representación llegal solicitó un orde d'alloñamientu, namás pa ella, pues la denunciante fizo constar espresamente que nun quería que les sos fíes cortaren la relación col so padre. Tres la declaración y la valoración de les circunstancies referíes, el Xulgáu de Pravia, acordies col Ministeriu Fiscal, acordó'l sobreseimientu de diches dilixencies refugando la orde d'alloñamientu.
Nun consta en dichu Xulgáu denuncia dalguna por cualeuier reacción violenta o amenaces del proxenitor hacia les menores, nin anterior nin darréu a lo esplicao.
Con posterioridá a les dilixencies antes referíes, en Xunu del 2013, la mesma denunciante presentó ante'l Xulgáu de Pravia una demanda civil de midíes paterno-filiales, pues la pareya nun taba casada anque la denunciante certificó que llevaben 10 años de convivencia.
Dicha demanda, na que nun se personó l'otru miembru de la pareya, resolvióse tres desarrollase'l procedimientu avezáu en dichos casos, en payares del 2013, aceptándose'l pidimientu de la denunciante de que'l padre pudiera ver a les sos fíes los martes y xueves de 6 a 8 de la tarde y, estableciéndose que, analizada la situación económica del padre, tendría qu'entregar 75 euros mensuales pa la mantención de cada fía.
Coles mesmes consta denuncia reciente nel mesmu Xulgáu por impagu per parte del proxenitor de les cantidaes referíes a algún de los meses, que se taba tramitando nesti momentu como posible ilícitu d'impagu de prestaciones familiares.
El tráxicu socesió que caltién conmocionada a la opinión pública asturiana prodúxose esti vienres. El padre de les neñes, J.I.B.A, matóles pa, darréu, suicidase tirándose pel viaductu de la Concha d'Artéu. L'home separárase de la so pareya de la que nunca tuvo casáu. Ello ye que tuvo viviendo un tiempu en Bilbao y volviera agora poco a Asturies. Les neñes teníen siete y nueve años respectivamente.
