BRUXELES, 19 de Xunu (EUROPA PRESS)
La Unión Europea y Reinu Uníu entamen esti llunes les negociaciones polítiques del 'Brexit' con una xunta en Bruxeles a la que la delegación británica llegó pidiendo trabayar pa una futura relación "fuerte y especial", pero na que la parte europea va defender la necesidá de resolver cuanto antes "les rocees" qu'afecten a los ciudadanos y polítiques europees pol anunciu del divorciu.
"Toi güei equí en Bruxeles pa entamar la siguiente fase del nuesu trabayu pa construyir una nueva, fonda y especial asociación cola Unión Europea", anunció a la prensa'l secretariu d'Estáu británicu pa la salida de la UE, David Davis, nuna comparecencia sin preguntes acompañáu pol negociador designáu pola UE, el francés Michel Barnier.
Davis quixo calcar en que "ye más lo que nos une que lo que nos estrema" y repitió el deséu de que la relación futura seya la de "aliaos y amigos", construyida de magar unos contactos "constructivos y positivos" y coles mires de contar con un vínculu "fuerte y especial" ente Reinu Uníu y el restu de la UE.
"Ye nos momentos difíciles como éstos ---dixo'l británicu en recordando a les víctimes de los incendios en Portugal y los últimos ataques en Londres-- cuando tenemos de recordar los valores y determinación que compartimos colos nuesos más cercanos aliaos n'Europa".
Davis encabeza la misión negociadora de Reinu Uníu, que va tener como interlocutor en nome de la UE a 27 al excomisariu de Mercáu Interior Michel Barnier.
Son los xefes negociadores designaos peles partes y reúnense formalmente la primer vez dende que va trés meses el Gobiernu de Theresa May activara'l procesu de 'Brexit', que tendrá qu'acabar primero que en marzu del 2019 dexen d'aplicase les riegles y Trataos de la UE en suelu británicu.
Por eso, la Unión Europea insiste na necesidá de centrar los esfuerzos "en llograr una retirada ordenada" que resuelva "primero" y con rapidez "les rocees" qu'esta situación creó pa los ciudadanos europeos y pa los que se beneficien de "les polítiques europees", dixo Barnier, en referencia a "la factura" que Londres tendrá qu'asumir antes de consumar el divorciu.
Xunto a estes dos prioridaes, la tercer 'llinia colorada' europea antes d'entamar una segunda fase que permita aldericar sobre'l futuru ye esclarar la situación en que queda la frontera esterior, sobre manera pa "evitar una llenda dura" nel Úlster que ponga en riesgu los Acuerdos de paz de Vienres Santu.
