Unes 20 agrupaciones, ente elles Xixón, aprueben llevar el debate de la oficialidá al Congresu de la FSA

Socialistes pola Oficialidá.
EUROPA PRESS
Actualizado: viernes, 22 septiembre 2017 11:36

UVIÉU, 22 Sep. (EUROPA PRESS) -

Un total de 17 agrupaciones municipales, amás de les Mocedaes Socialistes d'Asturies (JSA/MSA) y la sectorial autonómica d'educación, aprobaron la enmienda pa que la FSA-PSOE asuma la oficialidá de la llingua asturiana nel so Congresu. Ente elles destaca la de Xixón, la mayor de la FSA, y Llaviana, la del secretariu xeneral electu, Adrián Barbón.

Al traviés d'una nota de prensa unviada pol grupu de militantes 'Socialistes pola Oficialidá', señalen que l'aprobación d'esta enmienda contó con un "apoyu grande" nes asemblees de les agrupaciones socialistes de Xixón, "por alcuerdu de consensu", y en Samartín del Rei Aurelio, la tercera más numberosa del partíu, amás d'en Nava, Colunga y Llaviana.

Unos apoyos que se sumen a los d'estos díes atrás de les agrupaciones d'Uviéu, Llangréu, Siero, Llanera, L.lena, Sobrescobiu, Villaviciosa, Parres, Sariegu, Ayer y Candamu, amás de les Mocedaes Socialistes d'Asturies (JSA/MSA) y la sectorial autonómica d'educación de la FSA.

Pa 'Socialistes pola Oficialidá', esti "apoyu masivu" muestra que la oficialidá xenera consensu nes bases de les agrupaciones socialistes y que ye tamién un asuntu que cada vez tien un mayor apoyu ente los dirixentes socialistes de tolos sectores, "convirtiéndose nun elementu qu'axunta a los socialistes asturianos alredor del deséu de ser parte de la solución".

La enmienda, que se va debatir nel XXII Congresu Autonómicu del partíu, que se va celebrar ente'l 29 de setiembre y el 1 d'ochobre, busca sustituir l'artículu 367 de la ponencia marcu. Asina, quier que'l PSOE asturianu defienda la oficialidá de la llingua nel momentu nel que se produza una reforma del Estatutu d'Autonomía.

Dende 'Socialistes pola Oficialidá' señalen que la enmienda votóse nes principales agrupaciones por númberu de militantes y va llegar la selmana que vien al Congresu autonómicu con un "consensu grande", lo que los fai ser optimistes sobre les opciones de que la FSA-PSOE "se sume al consensu en favor del asturianu".

Asturianu ofrecido por