UVIÉU, 28 d'Ochobre (EUROPA PRESS)
El presidente de la Unión de Consumidores d'Asturies (UCE), Dacio Alonso, alertó esti martes 28 d'ochobre del peligru de "intrusismu" y d'instaladores "pirates" que puean aprovechase de la obligada resintonización de la Televisión Dixital Terrestre. Alonso criticó "la demoranza" del Gobiernu d'España en llevar cabu la lliberación del espaciu radioeléctrico llamáu "dividendu dixital".
Nuna rueda prensa, el presidente de UCE esplicó que la resintonización de les antenes colectives va afectar a unes 30.000 comunidaes de propietarios del Principáu d'Asturies.
La lliberación del espaciu radioeléctrico conocíu como "dividendu dixital" (800 Mghz) ye una obligación de la Unión Europea qu'esixe dexar llibre esti área pal desarrollu de la telefonía de cuarta xeneración (4G) per parte de les compañíes de telefonía móvil.
Los operadores de telefonía móvil mercaron nel 2012, por 1.800 millones d'euros, el derechu d'usu d'esta franxa del espaciu radioeléctricu. Según esplicó Dacio Alonso, d'esti preciu 800 millones d'euros destináronse a ayudes a los propietarios pa la necesaria resintonización de les antenes pero'l Gobiernu calculó'l gastu pa esta transición en 290 millones d'euros.
P'Alonso, el costu de l'adaptación ta "pagu y repagáu" polo que "nun pue costar un euru más a nengún propietariu". El presidente del colectivu criticó que tovía nun s'aprobara un Real decretu que regule la concesión d'estes ayudes pa la resintonización de les antenes que tendrá de tar llista pal entamu del 2015.
