Aviso: Esta noticia tiene más de un año. Última actualización: 14/09/2009 19:07
La Universidá d'Uviéu abrió güei'l plazu d'inscripción de la tercer edición del cursu de trabayu de campu en toponimia, dialectoloxía y cultural popular, que dirixe'l profesor Fernando Álvarez-Balbuena, cola collaboración y promoción de la Conseyería de Cultura.
El cursu d'estensión universitaria entamará'l próximu 6 d'ochobre y prollongaráse hasta'l 11 d'avientu. Lo que busca, básicamente ye formar encuestadores nos mentaos campos. En palabres del propiu Balbuena, "deprenderánse les técniques de lo que ye la encuesta, que puean valir pa esti tipu d'estudios", calcando n'aspectos como'l "tratu" cola xente, "la conocencia de l'asturies rural o la preparación previa del investigador".
Será un averamientu multidisciplinar a les diferentes técniques, estudiando temes como la llingua, el paisaxe, la historia oral, la musicoloxía o la lliteratura, pero siempre dende un puntu de vista etnográficu.
El cursu cuenta con 14 profesores especialistes en caún de les materies a tratar: Adolfo García Martín (etnografía y antropoloxía), Xosé Ambás (musicoloxía y etnografía), Felipe Fernández (xeografía), Irene Díaz Martínez (historia oral), Andrés Miranda y María Antonia Pedregal (organización de tierres y finques), Llino Álvarez, María Cueto y Fernando Balbuena (dialectoloxía y toponimia), Ramón Sordo Sotres (etnografía y toponimia), Ramón d'Andrés (sociollingüística), Xuan Busto (lliteratura oral), Xulio Viejo (toponimia y historia) y Alba Rodríguez (etnografía).
La programación tendrá una parte teórica y otra práctica, na que se realizarán encuestes, polo menos una de toponimia y otra de carácter musicolóxicu.
Balbuena consideró que "hai munchu interés creciente pol trabayu de campu com forma de conocencia cultural, pero poca formación". Por esti motivu considera necesariu esti cursu que, según recordó, ye abiertu a tol mundu, y nun exixe nengún conocimientu previu.
El preciu de la matrícula ye de 187,68 y el periodu d'inscripción acaba'l día 30 d'esti mes. Les clases serán nel campus del Milán.