UVIÉU, 21 d'Agostu (EUROPA PRESS)
La Universidá d'Uviéu empezó a aplicar la norma que torga siguir los sos estudios a los estudiantes que nun superaren un mínimu de 90 creitos (48 d'ellos han de ser de primer cursu) pa pasar a cuartu del so títulu de grau. Trátase d'un requisitu aprobáu pol Conseyu Social nel 2011 y qu'entraría en vixencia la primera vez esti añu pa los qu'empezaron la so carrera a partir d'esa fecha, puesto que nun tien calter retroactivu.
Asina lo confirmó en declaraciones a Europa Press el vicerrector d'Estudiantes, Luis Rodríguez Muñiz, que matizó sicasí que la Institución Académica va analizar aquellos casos que tean suxetos a situaciones escepcionales. Dexó claro, eso sí, que la normativa nun ye de la Universidá, sinón del Conseyu Social, y poro tien d'aplicase.
El representante universitariu nun contaba con un númberu concretu d'afectaos. Hasta'l momentu, la Institución recibió siete reclamaciones d'alumnos que se ven nesta situación, apuntó, frente a la versión de representantes estudiantiles que falen de decenes ya inclusive de cientos.
Dase la circunstancia de que la norma de los 90 creitos (equivaldríen a un cursu y mediu, anque tendría que tar superáu casi tou primeru) nun ye la única d'esti tipu qu'aplica la Universidá. Nos dos últimos años tamién s'aplicó otru requisitu aprobáu pol Conseyu Social, qu'obliga a tener superaos 12 creitos (aprosimao dos asignatures) por cursu. Unos 1.000 alumnos viéronse nesta situación nos cursos 2012-2013 y 2013-2014, y dellos unos 300 presentaron alegaciones, de los que 150 almitiéronse. El restu dexaron los sos estudios universitarios o empezaron otros distintos, según esplicó'l vicerrector.
Rodríguez recuerda que los que se vean afectaos pola entrada a valir d'esti nuevu requisitu tamién puen alegar y si les sos reclamaciones nun s'almiten quedará-yos la opción d'un recursu d'alzada ante'l Conseyu Rector de la Universidá. Nesti puntu matiza: "estudiaríase una aplicación más flexible, pero en nengún casu modificar la norma, porque eso correspuende al Conseyu Social".
Sicasí, el vicerrector considera qu'un alumnu que llegue a cuartu cursu sin poder aprobar 90 creitos "tendría que pensase si ta estudiando la carrera apropiada".
