UVIÉU, 19 de Payares (EUROPA PRESS)
El vicerrector de Planificación Económica de la Universidá d'Uviéu, Santiago Álvarez, mostró esti miércoles el "so preste a medies" pola subida en dos millones d'euros del presupuestu que-y dedicará'l Gobiernu autonómicu nel 2015 (126,6 millones). La cuantía, según comentó'l responsable universitariu, nun cubre l'aumentu previstu en gastos de nómines, que nesti cursu van incluyir el 25% de la paga estra, a abonar en xineru.
Asina lo esplicó en declaraciones a Europa Press el vicerrector de Planificación Económica de la Universidá d'Uviéu, Santiago Álvarez, qu'espresó "la so sensación agridulce".
Álvarez reconoció'l so aliviu al confirmase que'l Gobiernu autonómicu va contar con presupuestos pal 2015, y recordó los problemes que conllevaría pa la Institución Académica l'aplicación d'una prórroga presupuestaria, y la so correspondiente Llei de Creitu Estraordinariu.
Sicasí, matizó que de los 1,9 millones d'euros nos que s'estima la subida de la cuantía en referencia al anterior exerciciu, namás 1,1 millones son pa los gastos de nómina. Los cálculos del equipu rectoral dicen que la Institución precisaría 1,5 millones d'euros más pa cubrir l'abonu de la mentada paga estra a los funcionarios, acabante d'anunciar el ministru de Facienda, Cristóbal Montoro.
Recordó Álvarez amás que la cuantía correspondiente a dicha paga estra retiróla'l Gobiernu autonómicu nel so día, cuando foi suprimida, de les tresferencies económiques a la Universidá d'Uviéu, polo que considera xusto agora recuperar esi importe.
