UVIÉU, 22 d'Agostu (EUROPA PRESS)
El colectivu ganaderu de Usaga denunció que'l pasáu domingu 20 d'agostu l'osu volvió entrar na finca d'un ganaderu en Caldevil.la de Rengos, en Cangas, y otra vuelta volvió matar, "de primeres otres cuatro oveyes de momentu, porque nesti momentu'l so dueñu tovía nun pudo controlar el rebañu que ta espavoríu pel monte pa efectuar el recuentu de nuevu de tol fatáu y ver toles baxes qu'hubo".
El colectivu, al traviés d'un comunicáu, asegura qu'esti ye'l segundu ataque que se produz del osu a esti mesmu ganaderu en 15 díes.
"Dende Usaga queremos denunciar públicamente la situación a la que se nos ta sometiendo a los ciudadanos del mundu rural, demostrando que somos ciudadanos, yá non de segunda, sinón de tercera o más", destaca Usaga.
Como exemplu pon el colectivu de ganaderos qu'esti mesmu llunes na televisión pública del Principáu salió un ampliu reportaxe nel informativu de mediudía, en qu'encamentaben a les autoridaes a tomar midíes contra los palombos y les gaviluetes qu'afectaben bien negativamente al públicu que vive y pasia peles villes y cais d'Asturies, mientres qu'a los habitantes del mundu rural non solo naide toma midíes pa solucionar el problema de la fauna selvaxe que ta arruinando y aburriendo a miles de ganaderos sinón que se-yos quier dar cursos pa qu'aprendan a convivir con ellos.
"Nel mundu urbanu los xabalinos, los palombos y les gaviluetes molesten y hai que matalos yá porque afecten bien negativamente al turismu de les nueses ciudaes", ironiza Usaga.
