UVIÉU, 2 de Xunetu (EUROPA PRESS)
El presidente de la Sociedá Uvieína de Festexos (SOF) y conceyal de Cultura, Roberto Sánchez Ramos, presentó a la Xunta de Gobiernu del Conceyu d'Uviéu una propuesta pa que revise'l contratu de producción y coordinación xeneral del recintu festivu pa conciertos en La Iría, firmáu pol Gobiernu del Partíu Popular al cabu de la pasada llexislatura.
El conceyal d'IU esplicó na so propuesta que la SOF tramita los contratos necesarios pa la organización de los conciertos celebraos en La Iría, "por cuenta del Conceyu", ente los que ta'l citáu contratu de producción y coordinación.
Nesi sen, el conceyal de Cultura señaló que l'axudicación pa esta xestión realizóse por 98.505 euros, teniendo qu'abonar el contratista 13.010 euros pola esplotación de los servicios de chigres y zones de comida dientro del recintu. Amás dientro de les so obligaciones inclúise la "Impresión, xestión de venta d'entraes y control d'accesos".
Nestos dos puntos, Sánchez Ramos apuntó que pue haber posibles irregularidaes nel contratu d'axudicación. El conceyal esplicó que, no referente a los puestos de comida, el contratu paez "constituyir una especie de contraprestación o preciu que se satisfái de manera sui generis, a añadir al preciu de licitación que s'establez nel pliegu". Según el conceyal d'IU, "da la sensación de que d'esta forma la licitación de la producción inclúi'l pagu d'un preciu que sería un preciu inciertu, daqué que nun ye posible nos contratos públicos".
XESTIÓN APARTE
Pal conceyal de Cultura, la xestión de los chigres y zones de comida tendría de ser oxetu de "un procedimientu de contratación propiu y distintu del de 'producción', pa que l'interés municipal nun se vea menospreciáu cola más que posible perda de los ingresos que recibiría en casu de contratase la so xestión de manera afayadiza".
La otra "obligación" del pliegu onde vio posibles irregularidaes polo que tien qu'analizase "detalladamente" la impresión, xestión de venta d'entraes y control d'accesos de los conciertos municipales.
Dellos puntos llamaron a l'atención del responsable de Cultura: la fueya de taquilla cola recaldación bruta del espectáculu nun ye realizada nin supervisada por nengún funcionariu municipal. L'abonu a la SGAE de los derechos d'autor practicóse directamente pol contratista, y la SOF llendóse a aprobar los informes qu'ellabora y remite'l mesmu contratista de "producción", coles propuestes de liquidación de taquilla realizaes sobre les fueyes qu'él mesmu ellabora, sin participación nin supervisión de funcionariu públicu.
Amás, señaló que los servicios municipales de Fiscalización y Tesorería nun tienen accesu algún a unos fondos que nun se custodien nin nes cuentes de la SOF nin nes municipales hasta la so liquidación y que'l pliegu nun prevé "nenguna puerta d'accesu" a la información sobre estos fondos y la so recaudación y liquidación per parte del Conceyu, incluyíu l'accesu a los datos del sistema informáticu de venta y liquidación de la taquilla de los conciertos celebraos en La Iría.
