UVIÉU, 29 d'Agostu (EUROPA PRESS)
El secretariu xeneral d'UXT Asturies, Justo Rodríguez Braga, pidió esti vienres a los partíos políticos "altor de mires" p'aprobar los presupuestos qu'Asturies precisa. Al so xuiciu, estos presupuestos son "imprescindibles" pa cubrir los servicios básicos de protección social, educación, sanidá y creación d'empléu.
Amás encamentó a les formaciones polítiques que pongan per delantre de los sos intereses partidistes, los intereses de los asturianos. Asina lo señaló mientres la presentación de la 15 edición de la Escuela Internacional de Branu que'l sindicatu celebra a partir del 1 de setiembre en Xixón.
De la mesma, afirma que dende UXT nun son tan "inocentes de pensar qu'eso va ser fácil, dao qu'entramos nun añu electoral, y si foi difícil ya imposible que los hubiera nel 2014, sigue paeciéndonos igual qu'haya presupuestu nel 2015". Sicasí, creen que "la política ta pa resolver problemes", polo que van siguir "creyendo nella".
Al respecto de los datos de comerciu minorista publicaos esti vienres pol INE, Justo considera qu'esta baxada de consumu y empléu ta favoreciendo'l recorte de los salarios y el nivel de desempléu. Al so xuiciu, hai que tener en cuenta que la cobertoria a los paraos tamién cayó esponencialmente. Ante esta situación, el sindicatu critica que na actualidá la responsabilidá social que tendría de tener l'Estáu nestos asuntos, ta siendo cubierta por distintes organizaciones sociales.
