Vallaure critica que cualquier tituláu superior puea trabayar nel Belles Artes, según el conveniu del Gobiernu

UVIÉU, 03 de Febreru (EUROPA PRESS)

El conseyeru de Cultura y hasta esti vienres director del Muséu de Belles Artes d'Asturies, Emilio Marcos Vallaure, criticó "la situación catastrófica" del centru cultural, no que se refier a la so organización y al so personal, pues cualquier tituláu superior pue trabayar nél de conservador.

Vallaure refirióse a esta cuestión en declaraciones a los medios, tres la reunión de la Xunta del Patronatu na que s'aprobó'l so cese definitivu, dempués de 31 años al frente del Muséu, y tres nomalu conseyeru de Cultura l'actual Gobiernu. Pal día 13 queda convocada otra xunta na que se va tratar el concursu pal nomamientu del nuevu director.

El conseyeru criticó la situación de "personal catastrófica" na que vive'l Muséu, y qu'atribuyó en parte a la inclusión del centru nos convenios del Principáu en 1995 y del Institutu Adolfo Posada nel 2004.

Refirióse a que, según estos convenios, una persona con una titulación superior pue trabayar como conservadora del Belles Artes, sin más requisitos formativos, y de fechu "a los concursos de treslláu acudió personal del Gobiernu d'Asturies que tenía la titulación pero non los conocimientos" pa trabayar nel Belles Artes. "Nun paez lóxico", critica, "que'l director del Muséu de Belles Artes nun puea participar nos procesos selectivos del institutu Adolfo Posada porque nun ye funcionariu". A xuiciu del yá ex responsable de la infraestructura cultural, "toes estes coses minaron la organización del Muséu hasta estremos gravísimos".

Nesti sen, y faciendo un repasu de la so etapa como director del centru, considera que "un puntu d'inflexón foi la entrada de la colección Pedro Masaveu, en 1994, y que supunxo un saltu cualitativu nos fondos del Belles Artes". "Ehí l'Alministración debió ponese a ello, porque pasaba a ser ún de los cuatro primeros d'España, y nun podía funcionar con una colección de primera y una organización de tercera", señaló

Sicasí, tres la xunta, mostróse satisfechu de que "el patronatu seya consciente d'esos problemes, y va treslladalo a les organizaciones polítiques representaes nel Patronatu".

SIGUEN LES OBRES MAGAR LA PRÓRROGA

Vallaure descartó que la prórroga presupuestaria vaya a paralizar les obres d'ampliación. Van siguir, anque a un ritmu menor, aseguró'l Conseyeru. Na xunta del día 13, anunció, "vamos falar de les obres tamién, porque posiblemente d'equí al 13 tengamos un panorama presupuestariu más conocíu, y seya posible que nun haya un paru".

No referente a la elección del so sustitutu como director, mostró la so confianza nel procesu selectivu qu'entame la Xunta saliente de les próximes elecciones autonómiques del 25 de marzu. D'equí a esa fecha, según Vallaure, "va vagamos entamar los procesos de llibre concurrencia, d'acuerdu a la normes nacionales como cualquier muséu d'España importante". "La comisión d'espertos va facer el so informe y van ser otros (tres les elecciones) de xuru los que tengan que resolvelo", pues "el plazu nun varía". "Nun yera'l momentu de facelo con una xunta en funciones y un gobiernu en funciones", remacha'l conseyeru.

A lo último, destacó la próxima presentación nel Belles Artes del cuadru 'La cueva de Covadonga', de 1856, obra de Martín Rico, una pieza que pudo dexase escapar si na Conseyería de Facienda nun me faen una ampliación de creitu pa mercala". "Ye la segunda gran visión de Cuadonga", anuncia Vallaure.