Valledor (IX) piensa que'l pautu de Gobiernu col PSOE "nun ye'l meyor posible" y que "había otres opciones"

UVIÉU, 21 de Payares (EUROPA PRESS)

El diputáu por IX-BA-Verdes, y ex conseyeru de Seguridá, Xusticia y Igualdá, Francisco Javier García Valledor, considera que l'acuerdu de Gobiernu ente'l PSOE y la coalición "nun ye'l meyor posible" y piensa que "podíen existir otres opciones". Valledor argumentó'l so votu escontra'l pautu asegurando que la "negociación enfocóse pa qu'hubiere acuerdu sí o sí, lo que llendó muncho la capacidá negociadora" de la coalición.

Na intervención de García Valledor ante'l Conseyu Políticu d'IX, el que fuere conseyeru de Seguridá, Xusticia y Igualdá, asegura que "debería ser inaceptable" pa cualquier organización política que s'establezan vetos en cuanto a la so participación en determinaes árees de xestión.

Poro, critica que la so formación aceptare'l vetu de la FSA-PSOE pa que la coalición se ficiere cargu de mediu ambiente. "Ofrezmos la xestión de Mediu Rural pa que de pasu solucionemos dos importantes problemes a los socialistes: la sustitución d'una conseyería incapaz y l'asunción de la xestión del cambiu nun momentu nel que los problemes s'agudicen y nel qu'hai una llendada capacidá d'intervención", diz Valledor.

García Valledor tamién considera que dos de los principales motivos que provocaron el pautu fueron, per un llau, que los socialistes nun queríen enfrentase en solitariu a la crisis y per otru pa qu'ésti seya "el primer movimientu pa la candidtura de Javier Fernández, una vez que la direición dea por amortizada la etapa d'Areces".