UVIÉU, 28 Ago. (EUROPA PRESS) -
La comunidá de propietarios de les Torres Centru de La Llosa presentó esti vienres alegaciones escontra'l procesu de llicitación abiertu pa dar los espacios pa les barraques nes fiestes de San Mateo. Les barraques, según el pliegu de condiciones de la llicitación, allugaránse en La Llosa depués de cuatro años.
Nuna nota de prensa, el voceru de los vecinos criticó la "perpoca publicidá" d'esti procesu, y aseguró que nun fueron informaos "en nengún momentu" sobre l'allugamientu de les barraques nesa zona.
L'escritu, presentáu nel Rexistru Municipal de documentos del Conceyu d'Uviéu, conseña qu'esta falta d'información constitúi "una discriminación pa los que son verdaderamente afectaos por estos eventos".
Ente les alegaciones los vecinos apunten a los perxuicios que pue causar l'allugamientu de les barraques en La Llosa en materia de seguridá, amás de les molesties a los vecinos. Hasta la fecha, señalen, "hai una ausencia d'informes de la policía local y del serviciu municipal de bomberos que garanticen la seguridá pa esa instalación de barraques, asina como los informes del Ministeriu del Interior y d'ADIF en cuanto a la seguridá no que toca a la estación de Ferrocarril de La Llosa".
