SANTIAGO DE COMPOSTELA, 24 de Xunetu (EUROPA PRESS)
Delles decenes de víctimes y familiares d'afectaos pol accidente del tren Alvia nel barriu compostelanu d'Angrois, que cumple esti xueves 24 de xunetu'l so primer aniversariu, concentráronse na Praza do Obradoiro pa esixir "verdá, xusticia y non más mentires".
Con esti lema inscritu en camisetes de color mariellu, y detrás d'una pancarta que reclamaba igualmente 'Tresparencia y non mentires. Comisión d'investigación. Víctimes tren Santiago', les víctimes mostraron el so malestar a los pies de la Catedral compostelana pol fechu de que, 12 meses dempués del tráxicu accidente, "lo únicu que dicen --los dirixentes políticos-- son mentires".
En declaraciones a los periodistes, ante una gran espectación --con presencia de medios internacionales na capital gallega--, la diputada del PP na Asamblea de Madrid Teresa Gómez-Limón, miembru de la Plataforma Víctimes Alvia 04155, criticó la falta de collaboración per parte del Ministeriu de Fomentu y de les sos empreses públiques dependientes, Adif y Renfe.
"La ministra --por Ana Pastor-- díxomos que diben collaborar cola Xusticia y "nun foi asina", recalcó. "Tardaron bien de n'enviar documentación --requerida pol xuez qu'instruyía'l casu hasta esti mes de xunu-- y los actuales 12 imputaos del conseyu d'alministración d'Adif "negáronse a declarar", criticó. "Tán nel so derechu, pero nós pensamos que si nun tienen nada que tapecer lo que tienen que facer ye declarar y collaborar cola Xusticia pa que se sepa la verdá", sentenció Gómez-Limón.
Al respecto, tamién recordó la so reclamación de creación d'una comisión d'investigación pa "depurar responsabilidaes polítiques". "Y por 20 o 10 veces nególo'l Partíu Popular y el Partíu Socialista", censuró, antes d'alvertir que, al so xuiciu, a la lluz d'estos fechos, "en concencia la verdá nun la quieren saber, porque lo único que dicen son mentires".
