MADRID, 29 de Xineru (EUROPA PRESS)
L'Axencia Estatal de Meteoroloxía emitió'l so primer "avisu especial" del 2015 ante'l temporal de vientu, mar, agua y nieve que va afectar a la Península y Baleares, asina como a les sos zones costeres llenderes, dende la tarde d'esti xueves hasta'l próximu domingu.
La situación meteorolóxica debióse a una fonda borrasca que ta centrada nel Mar del Norte y que tien centros secundarios sobre l'oeste y el sur d'Europa. Esto va dar llugar a un temporal de vientu, mar, agua y nieve na mayor parte de la España peninsular, Baleares, Ceuta, Melilla y zones d'alta mar y costeres axacentes. Namás les isles Canaries van resalvar el temporal.
Asina, l'AEMET alvierte que s'esperen vientos "fuertes" con raches "bien fuertes" en prácticamente toles zones y que les sos raches puen superar los 110 kilómetros por hora de velocidá, lo que motivó l'avisu de nivel naranxa (riesgu importante) na costa cantábrica central y oriental y nel cordal Cantábricu dende esti xueves de tarde.
Mientres les primeres hores d'esti vienres, los vientos van tener raches máximes que van tar ente los 90 y los 100 kilómetru por hora en Pirineos y en zones medies y altes del terciu oriental peninsular de magar la tarde del xueves, mientres esti vienres y la mayor parte del sábadu. Esta predicción motivó tamién l'avisu de color naranxa nestes zones.
Per otru llau, señala que los fenómenos costeros van afectar a toes. En cuanto a los fenómenos costeros, van afectar a toles zones axacentes a la Península y Baleares. Nes costes de Galicia y Cantábricu va haber avisos naranxes a lo menos hasta'l sábadu.
Mientres, nes mariñes orientales del Mar de Alborán, los avisos tamién van ser por riesgu "bien importante" (naranxa) por vientos del oeste de fuerza 8 y foles de más de 5 metros. En Murcia esti sábadu l'avisu va ser tamién de nivel naranxa por vientos de suroeste con fuerza ocho y foles de 4 a 5 metros d'altor. El sábadu esti avisu va afectar tamién al Ampurdán (Girona). Nel restu de les zones los avisos van ser, a lo menos de nivel mariellu.
L'agua va ser "importante" sobremanera nel terciu norte, especialmente nes comunidaes cantábriques, onde les agües van ser persistentes mientres tol periodu (más de 40 llitros por metru cuadráu en 12 hores), y puen amás ser intenses (más de 15 llitros por metru cuadráu en 1 hora) mientres la tarde del vienres y primeres hores del sábadu nes rexones mariniegues de Cantabria y País Vascu y na metá oriental d'Asturies.
25 CENTÍMETROS DE NIEVE
Sobre les nevaes, l'Aemet prevé que les más importantes prodúzanse en Pirineos, onde'l vienres espérase que s'atroopen más de 20 centímetros de nieve en Navarra y 25 centímetros de nieve n'Huesca y Lérida.
Amás, señala que'l sábadu produciráse un descensu "importante" de la cota de nieve, hasta unos 600 metros na metá norte peninsular y 1000 metros na metá sur, pero al tiempu va baxar la cantidá de precipitación. Espérense pa esti día cantidaes de cinco centímetros de nieve nos montes de Galicia, cordal Cantábricu y de 15 centímetros nos Pirineos dende Navarra hasta Lleida.
