UVIÉU, 11 Jun. (EUROPA PRESS) -
Vincent García Riestra, protagonista de la obra '42.553: depués de Buchenwald', de Xuan Santori Vázquez, ganadora de la 23ª edición del Premiu Máximo Fuertes Acevedo d'ensayu en llingua asturiana, va visitar esti martes el Principáu pa participar na presentación del llibru, va ufrir una charla al alumnado del IES Padre Feijoo de Xixón y ser recibíu poles autoridaes asturianes.
Según informa el Gobiernu asturianu en nota de prensa, la obra ta basada na vida de Vincent García Riestra (La Pola, Siero, 1925), deportáu en 1944 al campu de concentración de Buchenwald (Thüringen, Alemaña) y últimu superviviente español nel campu de concentración mentáu. El so númberu nel campu yera'l 42.553 que da títulu al llibru.
Vincent García Riestra, de 93 años, vive anguaño en Francia, en Périgueux, na Dordoña y convirtióse nun referente éticu y moral de delles xeneraciones franceses y europees. Ye un héroe nacional francés, qu'ente les sos numberoses reconocencies tien la condecoración de más rangu de la República Francesa, la lexón d'Honor.
Desque foi lliberáu del campu de concentración hasta l'actualidá, con 93 años, Vincent García dedicóse a percorrer centros educativos franceses ufiertando'l so testimoniu a los más mozos pa que conozan, de primer mano, tol horror que supunxo'l nacismu.
Asina, el martes 12 de xunu a les 11.30 hores, va visitar el IES Padre Feijoo de Xixón onde va participar nuna charra-coloquiu con alumnáu de 2u y 4u de la ESO na que va cuntar la so esperiencia vital nel campu de concentración. El centru educativu va aprovechar la visita pa homenaxar a tolos deportaos asturianos plantando simbólicamente un árbol na so alcordanza.
Esi mesmu día, a les 19.30 hores, va presentar nel Muséu Arqueolóxicu d'Asturies, la obra '42.553: depués de Buchenwald' del autor Xuan Santori Vázquez, onde se narren les sos vivencies nel campu de concentración de l'Alemaña nazi, obra que foi ganadora de la XXIII edición del premiu Máximu Fuertes Acevedo d'ensayu en llingua asturiana que convoca'l Principáu d'Asturies.
